Pa di tres biaha YDK STAR MUSIC ta kolaborá ku e talentoso kantante kurasoleño Singelmar Hosé, pa interpretá e piesa APRESIO. Funda pa eskritor i músiko Jeanalbert Margarita, ya pa sinku aña YDK STAR MUSIC ta aktivo na Hulanda.
Despues ku Jeanalbert a toka pa diferente banda den e género di ritmo kombiná, na 2018 ela tuma e kurashi pa kuminsá eksperimentá ku su mes sonido, unda e ta krea su mes komposishon i letra. Durante e ultimo sinku añanan, e formashon YDK STAR MUSIC ya a lansa tres kansion, E promé titulá KURIOSO, a keda interpretá pa RINCHO X na 2018, sigui pa PABO SO na 2019 i THE ONE na 2021, tur dos interpretá pa Singelmar Hosé. Pa zomer di 2024, Jeanalbert ta kla pa introdusí YDK STAR MUSIC riba nos islanan ku diferente produkshon nobo.
APRESIO a keda inspirá pa e mihó amiga di Jeanalbert, ken den tempunan turbulento tabata un gran sosten i a yud’e pa eleva su mes. Jeanalbert a disidí pa skirbi un kantika dediká na e amiga, “asina’ki mi por honr’e komo e ‘super woman’ ku mi ta mire”, ela splika.
SINGELMAR HOSE
Singelmar Hosé, mihó konosí komo ‘Incho’, banda di ta un kantante talentoso, tambe ta un músiko vèrsá. Na edat di tres aña ela muda pa Hulanda ku su famia, unda foi chikitu e tabatin un pashon pa músika. Su ruman homber mayo a motive pa hasi algu ku su talento, i despues di a haña varios oportunidat pa militá komo ‘guest star’ di e banda The Friends, ela disidí na 2003, di lanta un banda pa hóben yama Chikititos. Aki Singelmar a aserka Jeanalbert pa forma parti di su banda, kuminsando un amistat di mas ku 20 aña. Singelmar ta komposita kantika na papiamentu pero tambe na hulandes, unda e ta interpretá diferente genero musikal manera Zouk, músika Rock, Reggae i músika Gospel.
YDK STAR MUSIC
Ku YDK STAR MUSIC, Jeanalbert ke eksperimentá ku diferente manera musikal inovativo pa emití emoshon ku Ritmo Kombiná, manteniendo un harmonia konstante entre ritmo, melodia i letra. Tambe Jeanalbert ta soña di pone e género riba mapa internashonal i ke transformá e manera ku bandanan di Ritmo Kombiná ta presentá ‘live’. Pa e lunanan benidero, Jeanalbert ta kompletando dos produkshon nobo. E promé piesa ta titula ‘Star Eyes’ i ta na ingles i papiamentu i lo keda interpreta pa Singelmar. E kansion ta inspira pa un fanátiko enamora, ku ta mira e artista komo un strea. “Mi ta skirbi loke mi ta mira dor di e fanátiko su wowo nan. Su atmirashon, su motibu, i su apresio”, Jeanalbert ta splika.
BròKèS 93.5 ………… Skuch’é!
.png)
