Palu di pasku.png
93.5 web logo.png
 

Intro

NÒMBER/ PALABRA: BRÒKÈS

Historia/ orígen: BròKèS ta originá di e palabra na ingles Broadcast.

Ántes tempu ku aki na Boneiru medio di komunikashon, radio, televishon etc no tabata asina konosí, organisadónan di evento públiko tabata kore rònt den barionan p’asina propagá nan respektivo evento. Esnan ku sin duda tabata hasi mas uso di e sistema en kuestion tabata partidonan polítiko, anunsiando reunion sea públiko o di kontakto. Riba outo tabata instalá un sistema di zonido ku un tipo di spiker ku debí na su forma na ingles nan ta yam’é horn speaker.

Serka nos pa igual motibu pero den dicho kaso en bes di kachu (horn) nan

batis’é ku e nòmber trègter. E sistema pa komuniká en kuestion nan tabata yama broadcast. Atraves di tempu, igual ku a sosodé ku hopi palabra di otro idioma, nos antepasadonan a krioyisá broadcast i na nos dushi lenga materno Papiamentu ‘Broadcast a bira Bròkès’.

BRÒKÈS 93.5

Entre e vários nòmbernan ku nos a pensa pa duna nos radio emisora, finalmente nos a skohe pa Broadcast/ Brokès. Konforme vishon i mishon den vários aspekto e nòmber aki ta kuadra eksaktamente.

 

1. FUNSHON: Primeramente un radio emisora su funshon prinsipal ta broadcast/ bròkès, kual kòrtiku spliká ta nifiká ‘transmishon amplio’. Pues e nòmber BròKèS ta direktamente konektá ku e funshon di un radio emisora.

 

2. VISHON I MISHON: Vishon i mishon di BròKèS 93.5 ta pa ampliamente transmití/ bròkès anunsio, informashon, edukashon, konsientisashon i dibertishon sano i positivo pa oyentenan i komunidat en general.

 

3. FÁSIL: Ademas di ta kuadra ku nos vishon i mishon, BròKèS ta un palabra fásil pa kapta i pronunsiá, kual ta un punto sumamente positivo pa entre otro e parti komersial i di merkadeo.

 

4. AKTUAL/ MODERNO: E palabra ‘broadcast’ ta unu hopi usá den e tempu aktual pa loke ta komunikashon, social media etc., asina por menshoná por ehèmpel ku e sistema di WhatsApp. Pues e palabra i nòmber lo zona konosí den orea di e oyente hóben, edat medio i avansá.

 

5. BRÒKÈS ENBES DI BROADCAST: Konsientemente nos a skohe en bes di Broadcast pa usa BròKèS. Ku esei nos ta kumpli ku un parti importante di nos vishon i mishon, o sea duna realse na nos historia, kultura etc i den e kaso aki en partikular nos idioma Papiamentu.