Dia 26 di mei último e minister di pobresa Carola Schouten tabata di bishita na Boneiru.
Minister tabata tin tambe riba su agènda un reunion ku Diálogo Sentral, kual USIBO tambe ta forma parti di e diálogo sentral aki.
Na final di e reunion aki USIBO a entregá e minister un map ku tres dokumento aden.
E ondersteuningsverklaring di e manifestashon di dia 12 di mei.
Un karta pa minister ku e petishon pa introdusí e mínimo sosial
I tambe e diferente potrètnan ku a wòrdu saka durante di e manifestashon di dia 12 di mei.
Manera ta konosí USIBO representando e klase trahadó i su famia den Diálogo sentral huntu ku e otro partnernan ya for di 2019 den e asina yamá “ Akuerdo di Kralendijk “ a bin ta boga pa gobièrnu ulandes stipulá un mínimo sosial pa asina nos por tin un arma pa kombatí pobresa riba nos islanan Boneiru, Saba i Statia. Un pobresa ku a bin ta asotá 40% di nos poblashon i ku a resaltá hopi fuerte den e klase trahadó kaminda tata i/o mama di kas mester bandoná nan yunan pa traha 2 te tres trabou pareu pa asina por kumpli ku nan responsabilidatnan di tur luna ku ta paga hür di kas, paga awa ku lus, paga transporte públiko, paga artíkulonan di uso personal. Intentonan pa baha e gastunan aki no a resultá i e pobresa a krese aun mas.
Na 2022 mirando ku apesar di tur rapòrtnan ku a sali riba e tema, pero tambe gritunan di ousilio ku a bin di diferente instansia, USIBO a usa e arma demokrátiko di un manifestashon popular pasífiko pa manda un mensahe Den Haag indikando ku nos no ta akseptá deskriminashon i ku nos kier trato ekivalente, manera esaki a keda skibí den e akuerdo di gobièrnu Ulandes. I tambe pa eksigí kumplimentu ku e Akuerdo di Kralendijk, ku tambe a forma parti integral di e akuerdo di gobernashon. E akshon, ku a trese un seishentisinku persona riba pia a duna fruta. Minister Carola Schouten un siman despues a bishitá Boneiru i a anunsiá ku entrante 1 di yanüari 2023 lo a subi ònderstant ku 22% i sueldo mínimo ku 18.2% mas a bin diferente otro medida pa aliviá e situashon.
Tabata konosí ku e medidanan ei no ta sufisiente i ku mester a sigui pone e preshon nesesario pa awor si stipulá un mínimo sosial definitivo. UNKOBON, ku ta e organisashon pa konsumidónan na Boneiru a kuminsá un kaso den korte kontra estado Ulandes pa obligá estado stipulá e mínimo sosial. E kaso ta andando.
USIBO un biaha mas mirando e seriedat di e situashon a drenta akshon i a forma un koalishon na Ulanda, na Saba i Statia i tambe aki na Boneiru di diferente organisashonnan pa bolbe realisá un manifestashon públiko. E biaha aki a logra riba 12 di mei pone entre 2500 pa 3 mil hende riba pia pa duna aun mas forsa na e mensahe direkshon Den Haag i un biaha mas ku éksito. Sekretario di estado van Huffelen a papia di un manifestashon impreshonante, miéntras ku miembro di Eerste Kamer Paul Rosemuller personalmente a kana den e manifestashon.
Djamars dia 23 di mei Tweede Kamer den su mayoria a akseptá un moshon den kual lo mester hasi esfuerso pa stipulá e mínimo sosial den 2024. Dianan 25 i 26 a tene un konferensha si trabou aki na Boneiru ku e tema huntu kontra pobresa, miéntras ku dia 26 minister Schouten tabatin un konsulta ku Diálogo Sentral, un biaha mas riba e tema aki, kaminda e la keda informá riba e ehersisionan ku Diálogo Sentral ta hasiendo pa yuda realisá stipulashon di e mínimo sosial mas pronto posibel.
Miéntras tantu Komishon Mínimo Sosial bou di presidensia di eks gezaghèber Glen Thode ta kompilando datonan pa asina por supstansia e stipulashon di e mínimo sosial i su finansiamentu.
USIBO kier a gradisí tur e organisashonnan, pero tambe esnan individual ku a yuda den organisá e manifestashon di dia 12 di mei, pero tambe tur esnan ku a kontribuí finansieramente pa yuda kubri e gastunan i “last but not least” e pueblo boneriano ku a sali en grandi i sin guia di outoridat polisial a manifestá pasifikamente mandando un mensahe kla i raspá NO MAS DESKRIMINASHON, NO MAS DESIGUALDAT, MINIMO SOSIAL AWOR.
BròKèS 93.5 ………… Skuch’é!
.png)
