TCB ta honra shofùr di taksi Ronald Bernabela pa su servisio i dedikashon eksepshonal

Komo parti di e programa di Bonaire Friends

Tourism Corporation Bonaire (TCB) ta kontentu di por anunsiá Ronald Bernabela komo e ganadó di mas resien di e programa di Bonaire Friends. Kevin Winter di Hulanda a nominá Ronald Bernabela pa su servisio i dedikashon ekselente na e industria di turismo.

Pa 46 aña kaba Ronald Bernabela ta forma parti di nos industria di turismo, kaminda el a traha den diferente funshon, manera den kushina i den kasino, i awor for di aña 1997 komo shofùr di taksi. E ta aserká su trabou ku pashon i ta kuida su pasaheronan bon. E ta hasi kareda privá ku nan i e ta sòru pa nan eksperensia na nos isla ta inolvidabel. Ronald ta konsiente di e impakto ku komo shofùr di taksi e tin riba eksperensia di nos bishitantenan i ta gosa ora e por surpasá nan ekspektativanan pa medio di hasi rekomendashon i kumpli ku nan nesesidatnan spesial.

TCB ta felisitá Ronald Bernabela ku su aporte remarkabel na nos industria di turismo, ku a hasié un embahador ehemplar di nos komunidat lokal. E kampaña di Bonaire Friends ta sigui enkurashá nos bishitantenan pa komparti nan storianan tokante nan enkuentronan eksepshonal ku e poblashon lokal di nos isla riba e página spesial di Bonaire Friends riba https://bonaireisland.com/bonaire-friends/.

Tur siman Tourism Corporation Bonaire ta selektá un persona ku ta meresé di risibí e premio, ku kua nos ta selebrá e hospitalidat i servisio eksepshonal di habitantenan di Boneiru. E programa di Bonaire Friends ta tira lus riba e kultura kaluroso i inklusivo di nos isla i ta invitá nos bishitantenan pa partisipá na nos komunidat lokal i kultivá amistatnan duradero.

BròKèS 93.5 ………… Skuch’é!