Nan a detene un hoben turca di 20 aña despues di revela ku e tabata traha komo dòkter na un hòspital apesar di no a siña pa esaki. Famia di Ayşe Özkiraz semper tabata ke pa e bira dòkter, pero e no a haña punto sufisiente pa drenta universidat. E hoben na luga di admiti su frakaso i sigui pa dilanti e la bisa nan ku e la drenta Universidad Médica Capa i ku e tabata studiando pa dòkter. Inkluso e la falsifika e èksamen i e papelnan pa su mayornan no sospecha nada. Pero esaki tabata djis e komienso di su mentira.
Pero e hoben a hasi algu mas ku gaña su famia, e la kuminsa gaña tur hende. E tabata bisa e hende nan ku e tabata studia pa dòkter, e la print un karchi di studiante falsu i a kuminsa kana den e universidat i relashona su mes ku e studiantenan real.
Despues di a gana e konfiansa di un hospital, nan a ofrese Ayşe Özkiraz pa traha einan i e la asepta apesar di no a studia nunka. Ku tempu e la gana e konfiansa di e medikonan. E la konta un dòkter ku e ke bira kinderchirurg inkluso e la hinke den un operashon. Durante e operashon e dòkter a bis’é: “ban, kose e herida abo.” Naturalmente ku mentira tin pata kòrtiku. I e dòkternan a kuminsa sospecha. Paso e hoben tabata evita kontesta preguntanan basiko of simpelmente e tabata kontesta malu. Ora nan tabata sigur ku e tabata gaña nan a yama polis.
Nan a detene i e la admiti na final ku e tabatin mas ku un aña gañando ku e tabata dòkter. E mayornan di e mucha muhe ahinda no por kere ku nan yu tabata gaña nan i nan ta kere ku mester lo tin algu mas den e historia di Ayşe.
===========================================
BròKèS 93.5 ………… Skuch’é!
.png)
