Sifranan di kriminalidat i tráfiko di 2022 pa Boneiru

Riba djaweps 11 di mei, e tim di maneho di kuerpo polisial (Korps Management Team (KMT) konsistiendo hefe di kuerpo, sr. Alwyn Braaf, hefe suplente i hefe di operashon, sr. Ronald Zwarter, hefe di e departamentu operashonal (Bedrijfsvoering), sr. Clark Mercera, hefe di e departamentu di reshèrshi, sr. Steven Senior, hefe di e departamentu di polis básiko (BPZ), sr. Edwin van der Giessen i hefe di e departamentu di informashon i ekspertisio, sr. Melvin Sint Jago, a presentá e sifranan di kriminalidat i tráfiko di aña 2022 pa Boneiru.

E sifranan ta mustra e kantidat di delito na Boneiru di 2022 ku a mèldu na polis i ku a repartí den sifra di Reshèrshi i sifra di e departamentu di Kuido Básiko di Polis. Durante e presentashon, sr. Braaf a duna palabra di bonbiní na miembronan di prensa i seguidamente a presentá sifranan di Reshèrshi. Na promé lugá delitonan kontra poseshon i propiedat bou di kua ta kai diferente forma di ladronisia (262), ladronisia ku violensia (6), i kiebro i demas (149). Entretantu e sifranan ta komparabel ku añanan anterior i tabatin un bahada remarkabel for di 2019. Pa loke ta trata kiebro den negoshi i bibienda tabatin un bahada remarkabel i un subida komprobabel di estafa i malversashon ku por deklará dor ku tin mas notifikashon di estafa i malversashon sibernétiko a konsekuensia di e yegada di e departamentu di krimen sibernétiko.

Seguidamente a presentá delitonan ku violensia bou di kua ta kai diferente forma di maltrato (168), asesinato/homisidio (0) i intento di asesinato/ homisidio (8), destrukshon (96) i menasa (99). Kompará ku añanan anterior tin un bahada notabel di 90% den maltrato general i un bahada den notifikashonnan di violensia doméstiko ku ta parsialmente tin di haber ku e kolaborashon ku instansianan manera Akseso. Djei a presentá algun kaso di reshèrshi ku ta andando i ku ta solushoná i a duna atenshon na e detenshonnan i hayasgo di droga en konekshon ku kontrabanda di droga den 2022. A konkluí e sifranan di reshèrshi ku dato di e departamentunan di Krimen sibernétiko, di Kriminalidat finansiero ekonómiko (FINEC) i di e tim di investigashon digital.

Despues di e sifranan di e departamentu di reshèrshi a presentá e sifranan di departamento di Kuido Básiko di Polis. Na promé lugá a presentá e sifranan di tráfiko bou di kua diferente tipo di aksidente (725). Despues a para ketu na e kantidat di but (573) i detenshon pa manehá bou di influensia di alkohòl (104) pa kua por nota un mehorashon signifikante den e promé 4 luna di aña 2023 ku 838 but i 77 detenshon pa manehá bou di influensia di alkohòl. A konkluí e sifranan di Kuido Básiko di Polis ku sifranan di e departamentu de ‘Veelvoorkomende Criminaliteit’ i a terminá e seshon ku un turno di pregunta.

BON Criminalieteit- en Verkeerscijfers 2022 (3)

.pdf

Download PDF • 19.37MB

BròKèS 93.5 ………… Skuch’é!