Nov 17, 20222 min read

SANIKOLAS I SU AYUDANTENAN TA YEGA BONEIRU DJASABRA AWOR

Djasabra awor 19 di novèmber 2022, Sanikolas i alrededor di 30 ayudante ta pisa suela di Boneiru. Despues di dos aña ku no tabata pèrmití pa selebrá e fiesta grandi di yegada di Sanikolas pa motibu di Covid-19, awor esaki ta posibel atrobe ku públiko. E evento e aña aki ta den Parke Wilhelmina.

Komishon Sanikolas Boneiru i Wedoe a keda enkargá un biaha mas pa organisá yegada di e Hòmber Santu.

Sanikolas i su ayudantenan ta yega ku toubot di Kompania di Tou Boneiru(KTB) i diferente otro boto ku lo nabegá i huntu yega waf Chicu Mercelina, 9or di mainta. Mirando e interes pa topa Sanikolas riba laman, ta hasi un yamada na doñonan di boto pa sigui reglanan marítimo. Na su yegada representantenan di gobièrnu di Boneiru lo yama e Hòmber Santu i ayudantenan bonbiní i deseá nan un estadia plasentero riba nos isla.

E aktividat den Parke Wilhelmina ta start for di 8or di mainta ku músika di Dj Xiano i Dj Marv ku animashon di MC Jo Café. Grupo di baile 'Dream Girls' lo duna diferente presentashon e mainta. Ta bai tin diferente stènt ku kos di boka dushi, artesania i un huki spesial pa mucha na enkargo di nos mes muchanan.

Un aktividat di mucha pa mucha.

Ayudantenan di Sanikolas lo presentá un tremendo show ku hopi kenshi, baile, kanto, ambiente i legria

Despues Sanikolas i su ayudantenan lo hasi un rekorido den diferente bario i saludá esnan ku no por tabata presente. Durante e dianan siguiente Sanikolas lo bishitá kas, akohida pa mucha, skol i fiestanan. Komishon Sanikolas Boneiru i Wedoe huntu ku Gobièrnu di Boneiru, WEB NV, Krioyo Paint i tur spònser amigu di Sanikolas ta deseá tur mucha un temporada plasentero.