Departamento di Salubridat Públiko a lansa un buki di reseta grátis ‘Dushi i salú ku bèrdura’. Ku e buki e departamento ke enkurashá siudadano pa kome salú. E buki di reseta ta forma parti di e kampaña ‘Sembr’Awe pa Kosecha Mañan.’ Den e buki ta usa bèrdura ku ta krese na Boneiru manera kalalú i moringa. Por haña e buki durante ora di ofisina na e departamento di Salubridat Públiko, Kaya Gilberto F. Croes 24. A lansa ‘Dushi i salú ku bèrdura’ riba 24 di novèmber 2023.
Durante un akto festivo, e departamento di Salubridat Públiko a para ketu promé na e logronan pa enkurashá un estilo di bida salú serka siudadano. Dies skol a haña nan propio greenhouse, pronto ta remplasá skrin di sombra na 7 skol. E barionan Rincon i Tera Kòrá ta haña pronto nan propio greenhouse.
Aeres Hogeschool Wageningen a traha material pa na skol siña mucha planta. E maestronan ku ta bai traha ku e material akí, a haña e siman akí un entrenamentu spesial pa esaki. Ku lansamentu di e buki di reseta, e departamentu di Salubridat Públiko a alkansá un logro nobo.
Pa e enkuentro di djabièrnè último, a invitá algun oradó ku kende e departamento ta traha estrechamente. Maurice Adriaens di LVV a enfatisá importansia kultivá bèrdura i fruta lokal i kohe awa ku ta kai. Onnie Emerenciana ta sostené e proyekto di greenhouse na skol. Huntu ku su yu di 7 aña el a duna un demostrashon kon alumnonan ta siña kuida mata. Ard Sonneveld di Aeres Hogeschool Wageningen, a duna un presentashon tokante e material di lès nobo pa skol. Na nòmber di Salubridat Públiko kolaboradó di maneho Sharine Loozen-Janga a deskribí na presentenan desaroyo di e programa pa bèrdura i fruta den kurso di aña.
Den presensia di Loozen-Janga, Toby Emerenciana i e kòki lokal Saeed Lourens a batisá e buki di reseta ku awa di koko. Lourens a aportá ku un par di reseta den e buki. Loozen-Janga a kompilá i editá sobra di reseta.
BròKèS 93.5 ………… Skuch’é!
.png)
