Reglanan Básiko Reforsá i Mas Sèn pa Akohida di Mucha na Hulanda Karibense

Djamars 23 di aprel Tweede Kamer a vota positivamente riba e proposishon di lei Akohida di Mucha BES. Den e proposishon di lei e reglanan básiko pa kalidat, supervishon i finansiamentu di akohida di mucha na Boneiru, Saba i Sint Eustatius ta stipulá.

Tambe gabinete a reservá alrededor di 8 mion euro adishonal pa aña den e nota di primavera (voorjarsnota) pa akohida di mucha na Hulanda Karibense. E sèn akí ta destiná pa sigui drecha aun mas e kalidat di akohida di mucha na Hulanda Karibense

Meta di e proposishon di lei ta pa ofresé bon akohida di mucha, sigur i pagabel pa tur mucha na Hulanda Karibense, di manera ku kada mucha tin oportunidat pa desaroyá su mes plenamente. Ambishon di gabinete ta pa akohida di mucha na Hulanda Karibense kumpli ku un nivel di kalidat komparabel ku esun na Hulanda Oropeo.

Ainda no a yega e nivel ei, Inspekshon di Enseñansa ta konkluí den su rapòrt resien relashoná ku un evaluashon provishonal na 2023. E organisashonnan di akohida di mucha ta traha duru riba esei. Pa fortalesé e esfuersonan akí, gabinete ta bin ku sèn adishonal.

Resultado di un investigashon di gastu di akohida di mucha ta mustra bon kla ku e gastunan pa akohida di mucha na Hulanda Karibense ta mas haltu ku a spera.

E supsidio ku e organisashonnan di akohida di mucha a risibí último añanan tabata pa hopi organisashon muchu abou pa kubri tur gastu. Esei ta konta partikularmente pa akohida di mucha, akohida di ‘gastouder’ i akohida di beibi.

Ku e sèn ku a reservá èkstra por sigui hopi di e rekomendashonnan di e investigashon tokante gastu di akohida di mucha. E ta permití organisashonnan pa traha riba e mehorashon di kalidat nesesario e añanan benidero. Den esei nan ta risibí sosten di e programa BES(t) 4 kids.

Entrante 2027 ta sigui baha e kontribushon di mayor tambe te na 4 porshento di e gastunan di akohida di mucha. E kontribushon di mayor ta bira e ora ei algun desena di dòler ku mayornan ta keda paga na akohida di mucha.

Pa mayornan ku no por paga esei, e entidat públiko tin e posibilidat pa paga e kontribushon di mayor. Akohida di mucha ta grátis pa nan.

Promé ku e proposishon di lei bira definitivo, ta bolbe present’é na Eerste Kamer. Ta spera ku e lei nobo ta drenta na vigor den e di dos mitar di 2025. E lunanan benidero ta trahando ainda pa kombertí e proposishon di lei den un Medida General di Gobernashon (Algemene Maatregel van Bestuur). Aki den ta inkluí eksigensianan di kalidat adishonal pa kua a konsultá diferente biaha ku e organisashonnan di akohida di mucha. Den zomer di 2024 ta tuma lugá un konsulta di internèt final.

BròKèS 93.5 ………… Skuch’é!