Kralendijk, Dia 28 di òktober último a selebrá e di 350 fiansa suministrá dor di Qredits Boneiru. E di 350 mikokrédito a keda ortogá na empresario Reksel Engelhart. Danki na e fiansa di Qredits, Reksel por bai realisá su negoshi di trúk di pan (‘foodtruck’) ‘Net Net Bo saku’. Qredits ta aktivo for di 2015 na Boneiru.
Empresario nobo i eksistente por bini na remarke pa un mikrokrédito di un maksimo di $50.000,- pa finansiá e komienso of ekspanshon di nan empresa.
Señor Elwin Groenevelt, Direktor di Qredits, Diputado Hennyson Thielman representando Entidat Públiko di Boneiru i e tim di Qredits Boneiru a entregá un chèk simbóliko na empresario Reksel Engelhart. Reksel ta un empresario lokal konosí pa su aktividatnan den media i su ròlnan komo aktor na Boneiru. E ultimo aña Reksel a invertí tempu den su edifikashon personal komo empresario, duna kontenido na su plan di negoshi nobo i ehekutá algun prueba pa loke ta e produkto ku e lo trese riba merkado. E empresa ‘Net Net Bo Saku’ lo yuda krea mas variedat den e sektor di trúk di pan (‘foodtruck’) na Boneiru.
Qredits Boneiru tin komo meta sostené empresarionan pa start nan negoshi òf inbertí den nan empresa eksistente. Esaki dor di ofresé entre otro mikrokrédito te ku un suma di $50.000, coaching, i medionan pa desaroyá na e empresario i su negoshi. Tambe Qredits ta ofresé krédito transitorio yamá ‘corona-overbruggingskrediet’ na un montante máksimo di $40.000,- pa yuda empresarionan sobreviví e efektonan di e krísis aktual di corona. E empresario ta paga un interes entre 1.75% i 6.75% durante e periodo di fiansa. E porshento di interes apliká ta dependé di tipo krédito transitiorio.
Qredits a habri su portanan den 2015 na Boneiru i su ofisina ta situá na Kaya Industria 15-G. Entretantu Qredits a risibí hopi aplikashon pa tantu fiansa mikro i krédito transitorio di empresarionan lokal. Aktualmente tin 300 krédito otorgá i tin hopi petishon ainda den proseso. E tipo di empresanan finansiá ta hopi variá i ta aktivo den diferente sektor. Tur tabata tin difikultat pa yega na fondonan finansiero i tabata tin mester di e empuhe nesesario. Qredits ta haña importante pa e empresario tin ganashi den tur sentido di palabra. Pa e motibo ei Qredits – komo entidat finansiero sin metanan lukrativo – ta ofresé krédito, kurso i konseho na su klientenan. Tur kos pa bo ganashi!
Pa mas informashon tokante di Qredits Boneiru i nos produktonan finansiero i edukativo, por bishitá https://bonaire-nl.qredits.com/. E wèpsait aki ta disponibel na dos idioma: Hulandes i Papiamentu. Petishon pa un krédito por keda hasí na un manera fasil i simple via di e wèpsait.
.png)
