PUNTO DI BISTA; CEDDRICK SOLEANA;

Di berdat kosnan a bira karu, mi no por nenga.

Na Boneiru ta karu, Kòrsou, Aruba segun mi rònt mundu a bira karu.

Ken sa kiko mester hasi pa baha e preisnan??? Pasó ta loke ku mi a bin ta bisa pa basta aña kaba, ku niun gobièrnu insular no ta kapas pa hasi muchu mirando ku e lokenan ku ta influensiá preis no ta den nan man.

Oké, ata mi pregunta aki:

KEN NA BONAIRE TA HABRI UN SUPERMERKADO, PÒMP DI GASOLIN ÒF KUALKE OTRO ESTABLESIMENTU KU PREISNAN NA SUEALA PA PUEBLO?????

Abo ku ta keda remarká ku gobièru no ta hasi nada, porfabor habri bo negoshi i ofresé bo produktonan kasi pòrnada. Stail di "Voedselbank"..... Pasó ta parse ku papia ta mas fásil ku hasi serka sierto hende. Mas biaha mi a bisa tambe, ki dia nos ta siña husa nos rekursonan ku mas deligensia. Prioridat!

Awor si preis di webu a subi, ki dia ta invertí den algun galiña pa bo provehé den bo propio konsumo.

No bin bisami ku bo no tin sèn, pasó kisas e loke ku bo a gasta na e siman di fiesta di 27 di aprel te ku 1 di mei, por a sera un bon sèn pa inverti den algun galiña.

Esei ta loke tambe kada bes ta presentá despues ku tin di nos ta kaba gasta e sèn na pantomina i kaba ta bai yora i reklamá kos ku niun hende no por kambia ku no ta nos mes.

Si preis di gasolin ta subi òf baha no ta kulpa di niun gobièrno, sigur no na Boneiru, Aruba i òf Kòrsou.

Asina mi por sigui menshoná hopi kos mas ku bo sa for di awor’aki ta bai bira deskushon despues di kada fiesta òf pachanga ku ta riba kalènder. Stail di Ladies Night ku ta bira ‘Ladies Fight & Colour’, ….......

Ta hopi kos tin ku nos por atendé den nos mes seno pa alivia nos mes di e krisis mudial aki.

Mi no ta bai papia di Hulanda mes awor aki, pasó loke ku ta pasa na Boneiru bo por tradusí esaki ‘1 op 1’.

No kome mi na bida, laga nos tur ban konsientisá nos mes ku nos por biba mas efisiente.

Ántes tambe kosnan tabata karu kompará ku awendia, tòg nos ántepasadonan a sa di husa nan sintí i logra ku awe nos ku a keda atras tin e bida ku nos tin aki.

Djis pens'é!

Esaki tabata ‘PUNTO DI BISTA’ di Ceddrick Soleana

BròKèS 93.5 ………… Skuch’é!