Despues di e gran apertura di Siman di Muzik pa Mucha 2023 ku a tuma lugá na SKAL Djadumingu último. Art Cultrure Education Foundation ta sigui ku e programa ku un tour den bario pa asina yega na e klousura. Pa djaluna 22 di Mei, lo tin un workshop i show di steelpan bou di palu di tamarein na Tera Cora. Pa djamars 23 di Mei e tur ta hasi su siguiente stòp na School of Performing Arts Bonaire ku ta situa den e edifisio di Sporthaal na Kaya Amsterdam. Einan lo tin un workshop di Afro Beats, Afro Caribbean music i músika Krioyo. Djárason 24 di Mei e tour lo sigui pa Nikiboko kaminda ku na Parke Lalan Clarinda lo tin un workshop i show di reggae tresé pa Roots Vibrations. Pa djaweps 25 di Mei nos lo sigui pa Antriol kaminda ku na Plasa Chiku Goeloe lo tin un workshop di diferente ritmonan latino. Yegando fin di siman pa djabierne 26 di Mei lo tin un workshop di brass ku ritmonan manera Samba i mas na Casa de Musica situá patras di misa di playa. Djasabra 27 di Mei e tour ta sigui pa e kuna di nos kultura na Rinkon, kaminda ku na Mangazina di Rei den e aktividat di “Nos Zjilea” ku tin e tema “Ban toka Musika Krioyo” nos muchanan lo bai siña toka Ka’i Òrgel i otro instrumentonan krioyo. Di djaluna pa djabièrnè e aktividatnan aki lo ta di 5or pa 7or, kaminda ku e promé ora ta dediká na workshop i e di dos parti na show. Pa djasabra e orario ta di 11or di mainta pa 1or di atardi. ACE Foundation ta invitá tur mucha ku e ke siña mas di muzik pa bin tuma parti di e workshopnan aki. Naturalmente mayornan tambe ta bon bini pa mira e workshopnan aki tuma lugá i tambe pa eksperensia e diferente shownan durante siman. Naturalmente ACE Kids Club tambe lo tei henter siman ku un show pa nos muchanan.
Despues di e tour den barionan nos ta bai bek djadumingu 28 di Mei pa 5or di atardi na SKAL kaminda tur kos a kuminsá pa asina ku un programa karga ku diferente presentashon nos sera e siman di Muzik.
ACE Foundation kièr a yama un danki na tur ku tabata presente pa e apertura di siman di Muzik. Pa mas informashon chek nos paginá di Facebook, Ace Bonaire, kaminda nos lo pone tur informashon di Siman di Muzik. Den transkurso di siman nos lo duna mas informashon tokante e klousura di Siman di Muzik.
BròKèS 93.5 ………… Skuch’é!
.png)
