Djabièrnè 26 di aprel, Kooperativa Piskabon a entregá un boto nobo na Edwin Domacasse, mihó konosí komo Tio, Rondó òf Ronny, un boto pa asina e por sigui gana su pan di kada dia.
Dia 9 di aprel último e piskadó aki di 84 aña a pèrdè su boto na un manera misterioso. Mesora a sali diferente persona ku ker a duna un man pa por yega na un otro boto.
Buddy Leijnse, propetario di Bonaire Marine Center ku aserká Piskabon, ku e pregunta kon ta bai organisá esaki, pasobra dos señora a yega serka dje i nan ker yuda Tio.
Mesora Piskabon a aktivá, komo ku ya kaba tabata biba e pensamentu kiko nan por hasi pa e piskadó legendario aki.
Yamadanan di telefòn a keda bai bin i koperashon i idea tabata drenta di tur banda.
Hopi esfuerso kolektivo a buta ku den apénas dos siman di tempu ku a mobilisá por a hasi entrega di e boto na Tio.
Piskabon ta yama danki na Margareth Kley, Helena van de Geijn, Buddy Leijnse i su sra di Bonaire Marine Center, Jason Noordhof, Rudy de Jongh i Don Andres Kòrsou i na Boneiru, sr.Davelaar i su tim na Curaçao Port Services, Magnolia i Chloe di Mang Entrerprises B.V., Miguelito Abrahams di Haven en Loodswezen Bonaire, Pam Teitel di Budget Marine i sra. Gabriela i sra. Comenencia di HVI na Kòrsou.
Tur e personanan aki a koperá di un manera òf otro pa Tio por a yega na un otro boto mas lihé posibel. Danki tambe na tur persona ku a hasi donashon via e kuenta bakario di Piskabon i p'asina kontribuí ku e gastunan ku tabatin. Tambe danki na famia di Rondó ku a depositá konfiansa den Piskabon.
Ernest de Lanoy di Piskabon ta konkluí: “Un biá mas a demonstrá ku union ta hasi forsa i si nos ke nos por logra hopi.”
.png)
