Notisia di polis di djaluna 5 di yüni te ku djárason 7 di yüni 2023

‘Hit & Run’

Den oranan di mainta riba djamars 6 di yüni, un ‘hit & run’ a tuma lugá riba Bulevar E.E.G.. Outo 1 ku tabata kore direkshon sùit a para na e krusada di Bulevar E.E.G. i Kaya Ir. R. Statius van Eps pa motibu ku e outo su dilanti kier a lora lenks. Na e momentu ei, outo 2 a dal tras di outo 1. Na momentu ku e shofùr di outo 1 tabata yamando CRS, shofùr di outo 2 a subi outo i kore bai. KPCN ta hasi un yamada na shofùr di outo 2, di kua su plachi di number ta konosí, pa mèldu su mes na warda di polis.

Kòntròl di tráfiko riba Kaya Korona

Riba djamars 6 di yüni a tene un kòntròl di tráfiko riba Kaya Korona. A para i kontrolá un total di 39 vehíkulo.

A skirbi un total di 9 prosèsferbal.

E prosèsferbalnan tabata pa lo siguiente:

3x pa manehá sin faha di seguridat bistí

4x pa manehá sin seguro bálido

2x pa manehá sin reibeweis bálido

1x pa laga un menor di edat manehá sin reibeweis

KPCN ta konsehá estriktamente pa kumpli ku e reglanan di Lei di Tráfiko. Ku esaki bo tambe ta kontribuí na un tráfiko seif i sigur riba e isla. E periodo benidero lo bai tene kòntròl regularmente, kaminda lo aktua ku man duru na momentu ku no tin e dokumentunan menshoná ariba na òrdu i tambe si no ta kumpli ku reglanan di tráfiko.

Bo no ta kumpli ku reglanan? Bo por haña un but. E suma di un but pa e violashonnan menshoná ta varia entre $30 te ku $225.

Aksidente entre outo i skuter

Riba djaluna 5 di yüni un aksidente entre un outo i un skuter a tuma lugá riba Bulevar Gobernador N. Debrot. Shofùr di un outo ku kier a subi Bulevar Gobernador N. Debrot for di un hanchi, no a mira e skuter ku tabata aserkando. E skuter a dal den e outo. Pa e motibu aki e pasahero di e skuter a kai. Personal di ambulans a trata e víktima na e sitio mes.

BròKèS 93.5 ………… Skuch’é!