Detenshon pa manehá bou di influensia
Riba djaluna 30 di òktober, alrededor di 8.15 or di anochi, a drenta notifikashon tokante un kaso di ‘Hit & Run’ riba Kaminda Lagun. A logra para e vehíkulo ku a kore bai na Kaya Sabalo. Na yegada di patruya a konstatá ku e shofùr ku a okashoná e aksidente i kore bai tabata bou di influensia di alkohòl. A hasi un tèst di supla kuné i en konekshon ku resultado di esaki, a detené. Ademas di esaki e no tabata disponé di un reibeweis ni seguro bálido. Ta trata di un hòmber di inisial M.A.M.A. di 53 aña di edat. El a haña un but pa e violashonnan menshoná.
Kòntròl di velosidat
Den oranan di mainta riba djamars 31 di òktober, agentenan di Kuerpo Polisial Hulanda Karibense (KPCN) huntu ku e klas nobo di aspirantenan di polis, simultaniamente a tene dos kòntròl di tráfiko dirigí riba velosidat di vehíkulonan. E aspirantenan di polis a forma parti di e kòntròl pa e promé periodo di stazje pa e modulo di aktuashon preventivo. E kòntròlnan di tráfiko a tuma lugá riba Bulevar EEG i riba Bulevar Gobernador Nicolaas Debrot. A midi velosidat di vehíkulonan ku tabata aserkando ku un aparato pa midi velosidat spesial (lasergun).
Durante e kòntròl riba Bulevar EEG a midi e velosidat permití tantu den área urbanisá (bebouwde kom, 40 km) i pafó di bebouwde kom ku ta 60 km pa ora. A midi velosidat di un total di 50 vehíkulo i a duna 2 but pa surpasá e velosidat máksimo di 40 km pa ora ku ta permití. E velosidat ku a midi tabata entre 37 pa 62 km pa ora.
Durante e kòntròl na Bulevar Gobernador Nicolaas Debrot a duna 4 but pa surpasá e velosidat máksimo di 40 km pa ora ku ta permití den área urbanisá (bebouwde kom). E velosidat ku a midi tabata entre 50 pa 60 km pa ora.
KPCN lo kontinuá ku e tipo di kòntròl dirigí riba velosidat aki na diferente parti di nos isla i ta atvertí tur outomobilista pa paga tinu riba nan velosidat. Den área urbanisá (bebouwde kom), 40 km pa ora ta e velosidat máksimo permití i pafó di bebouwde kom ta 60 km pa ora.
Detenshon pa maltrato
Riba djamars 31 di òktober, alrededor di 11.20 or di anochi, ‘meldkamer’ sentral a risibí notifikashon tokante un kaso di maltrato na Kaya Essequibo. Na yegada di e patruya, tabatin un dama heridá na suela banda di un outo. Despues di un investigashon mas aleu a resultá ku e dama tabatin diskushon ku un hòmber den outo i na dado momento e hòmber a maltratá e dama motibu pa kua el a resultá heridá. Despues e hòmber a bandoná e sitio. Ambulans a transportá e dama pa hòspital pa tratamentu médiko.
Alrededor di 11.20 or di anochi riba djamars 31 di òktober, a detené e hòmber di inisial J.S.C.L. di 27 aña di edat na Kaya Paris pa maltrato. Ta investigando e kaso.
Detenshon
Riba djárason 1 di novèmber, alrededor di 12.10 or di mardugá, a detené un hòmber di inisial J.B.A. di 41 aña di edat pa no duna oido na òrdu di polis i pa resistí detenshon. Durante un intermediashon e sospechoso no tabata ke duna oido na òrdu di polis. Durante su detenshon e tabata resistí fuertemente, di kua el a kai na suela i a haña un kap na su kabes. Personal di ambulans a trata e sospechoso na e sitio i a transport’é despues pa warda di polis.
Ketu bai diferente but pa violashon den tráfiko Entre djaluna 30 di òktober i djárason 1 di novèmber a duna diferente but pa violashon den tráfiko durante kòntròlnan rutinario.
E butnan tabata pa lo siguiente:
6x pa manehá sin reibeweis bálido
4x pa manehá sin seguro bálido
6x pa manehá sin faha di seguridat bistí
1x pa tene telefòn den man miéntras ta manehá
KPCN ta hala atenshon di un i tur pa nan tin e dokumentunan nesesario, na òrdu. Tambe ta konsehá estriktamente pa kumpli ku e reglanan di Lei di Tráfiko.
Bo no ta kumpli ku reglanan? Bo por haña un but. E suma di un but pa e violashonnan menshoná ta varia entre $30 te ku $225.
BròKèS 93.5 ………… Skuch’é!
.png)
