Aksidente
Den oranan di anochi riba djamars 30 di mei, un aksidente a tuma lugá riba Kaya Papa Cornes. Un outo a kore bai dal den un kashi di koriente. E shofùr a deklará ku pa un tempu kaba su outo tin problema ku brek. Ambulans a transportá e shofùr pa hòspital pa tratamentu médiko. Pa motibu ku tabatin holó di huma, brantwer i e kompania di elektrisidat a bini na e sitio. Despues di un investigashon kòrtiku, por a konstatá ku no tabatin kandela pero ku mester a remplasá un piesa.
Búskeda di hòmber pèrdí un biaha mas sin resultado
Riba djamars 30 di mei a sigui ku búskeda di e hòmber pèrdí Arthur “Turbo” Cecilia. For di den oranan di mainta a kontinuá e búskeda bou di guia di Kuerpo Polisial Hulanda Karibense (KPCN) den kolaborashon ku Wardakosta, ku tabata buska tantu riba tera komo ku helikòpter.
Pa 12 or di mèrdia a terminá ku e búskeda sin resultado. Polis ta keda ku debido atenshon pa e kaso i ta pidi kualkier persona ku por a mira òf tende algu, tin informashon òf sa paradero di Arthur “Turbo” Cecilia, pa tuma kontakto ku polis na 715 8000, 911 òf via e liña di tep anónimo 9310.
BròKèS 93.5 ………… Skuch’é!
.png)
