Notisia di polis di djaluna 11 di sèptèmber te ku djabièrnè 15 di sèptèmber 2023

Trùk a bòltu

Riba djabièrnè 15 di sèptèmber, alrededor di 8.15 or di mainta, un trùk ku tabata transportá gasòil a bòltu na altura di Karpata. Kousa di e aksidente ainda ta deskonosí. A yama diferente partner di servisio pa tene e situashon bou di kòntròl. Ambulans a transportá e shofùr di e trùk pa hòspital pa kòntròl médiko. Polis a sera kaya pa tur tráfiko kaminda e aksidente a tuma lugá te ku un próksimo aviso.

Detenshon maltrato ku arma

Alrededor di 3 or di mardugá riba djabièrnè 15 di sèptèmber, ‘meldkamer’ sentral a risibí notifikashon tokante un bringamentu na un establesimentu di hóreka situá na Kaya Grandi. Na yegada di e patruya, tabatin hopi hende pará pafó i tabata mustra ku e bringamentu a terminá. Aki tabatin un hòmber heridá despues ku probablemente e sospechoso a maltrat’é ku un bòter.

Algun ratu despues atrobe a start un bringamentu kaminda e sospechoso enbolbí den e promé bringamentu, a kuminsá bringa ku un otro hòmber. E agentenan a haña nan obligá di hasi uzo di nan ‘pepperspray’ pa para e bringamentu. Na e sitio a detené un hòmber di inisial L.J.A.A. di 21 aña di edat pa maltrato i maltrato ku un arma. Ambulans a transportá e víktima ku a resultá herida pa hòspital pa tratamentu médiko.

Aksidente entre outo i baiskel

Riba djaweps 14 di sèptèmber, alrededor di 10 or di anochi, meldkamer’ sentral a risibí notifikashon tokante un aksidente entre un outo i un baiskel riba Kaya Korona. Shofùr di e outo a deklará ku e tabata koriendo direkshon nort riba Kaya Korona i e vehíkulo ku tabata kore su dilanti a lora na man drechi. Na e momentu ei, diripiente el a mira un baiskel su dilanti. E baiskel no tabatin lus. E shofùr a purba wanta brek, pero a dal e siklista. Pa e motibu aki e siklista a resultá heridá. Personal di ambulans a atendé ku e víktima na e sitio mes.

Pikòp na kandela

Alrededor di 02.30 or di atardi riba djaweps 14 di sèptèmber, ‘meldkamer’ sentral a risibí notifikashon tokante un outo na kandela na un kas situá na Kaya Lelie. Na yegada di patruya a topa ku un pikòp stashoná bou di un dak den kurá di e kas i e habitantenan mes a logra paga e kandela kaba. Pero esaki a pèrkurá pa molèster di un kantidat di huma. Brantwer a bini na e sitio pa terminá e trabounan i a pèrkurá pa tur kos tabata bou di kòntròl. No tabatin herido. E vehíkulo i parti di e dak ku e outo tabata pará bou di dje, a haña daño dor di e kandela. Brantwer i e deportamentu di investigashon forénsiko di KPCN a hasi un investigashon mas aleu pa saka’fó kousa di e kandela. For di e investigashon a resultá ku aparatonan ku tabatin bateria ku a keda den e outo, a kousa e kandela probablemente despues ku nan a keinta dor di kayente di solo.

Kuerpo Polisial Hulanda Karibense(KPCN) i Kuerpo di Bombero Hulanda Karibense(BKCN) ta hasi un yamada na doñonan di vehíkulo pa tuma medidanan preventivo relashoná ku e kayente ku tin. No laga ophetonan eksplosivo i peligroso keda den outo manera laiter, bleki di limonada, aparatonan ku ta uza bateria, barí di kombustibel òf produktonan inflamabel. Aparte di esaki, laga bo bentana di outo na un skref habrí i stashoná bo outo mas tantu posibel den sombra òf protehá si ta posibel bo winshil ku un tapasolo.

Aksidente

Riba djaweps 14 di sèptèmber, alrededor di 12 or di mèrdia, un aksidente a tuma lugá riba Kaya Nikiboko Sùit. Un outo a dal den kurá di un kas. E shofùr a deklará ku el a haña problema ku klùch. Pa e motibu aki el a resultá heridá i ambulans a transport’é pa hòspital pa tratamentu médiko.

Outo na kandela

Alrededor di 12.30 or di mardugá riba djaweps 14 di sèptèmber, ‘meldkamer’ sentral a risibí notifikashon tokante un outo ku tabata na kandela dilanti di un kas situá na Kaya Hulanda. Ta trata di e mesun adrès kaminda djaluna 11 di sèptèmber tabatin dos outo na kandela. Brantwer a bin na e sitio i a paga e kandela. No tabatin herido. Polis a konfiská algun artíkulo pa investigashon. Ta investigando e kaso.

Si bo a mira òf tende algu ku por yuda ku e investigashon, e ora ei bo por mèldu esaki via 715 8000 òf via di e liña di tep anónimo 9310.

Aksidente entre dos vehíkulo

Riba djárason 13 di sèptèmber, alrededor di 12 or di mèrdia, un aksidente a tuma lugá riba Kaya Amsterdam. Pa motibu deskonosí, un outo i un SUV a dal den otro. Ambulans a transportá shofùr di e outo pa hòspital pa tratamentu médiko i e personal di ambulans a atendé ku shofùr di e SUV na e sitio mes. A sera e kaya un ratu pa CRS por a hasi nan trabou. Despues a habri e kaya bèk.

Diferente prosèsferbal pa violashon den tráfiko

Riba djaweps 14 di sèptèmber, alrededor di 09.45 or di anochi a para un pikòp na Kaya Gepi pa un kòntròl rutinario. Durante e kòntròl, e shofùr no por a mustra papelnan di seguro bálido. Pa e motibu aki el a haña un prosèsferbal.

Alrededor di 06.30 or di anochi a para un skuter ku dos persona riba Kaya International. E shofùr tabatin su reibeweis i hèlm na òrdu pero e no por a mustra su dokumentunan di seguro. Pa e motibu aki el a haña un prosèsferbal.

Riba djaweps 14 di sèptèmber, alrededor di 2 or di mèrdia, a para un outo riba Kaya C.E.B. Hellmund. E shofùr a pasa den un kaya ku tabata será. Pa e motibu aki el a haña un prosèsferbal.

Riba djárason 13 di sèptèmber, alrededor di 10 or di anochi, un patruya a spòt un outo ku un lus di dilanti defekto riba Kaya Industria. A duna e shofùr señal pa para pa un kòntròl. Despues di un kòntròl mas aleu a resultá ku e shofùr tabata menor di edat i tabata manehá di e manera ei sin reibeweis. Pa e motibu aki el a haña un prosèsferbal. Un konosí a presentá na e sitio ku un reibeweis bálido i a bai ku vehíkulo.

Den oranan di atardi riba djárason 13 di sèptèmber a duna dos shofùr un prosèsferbal. E promé shofùr tabata enbolbí den un aksidente entre dos outo riba Kaya Grandi. El a haña un prosèsferbal pa manehá sin seguro bálido i sin reibeweis bálido. E di dos shofùr tabata enbolbí den un aksidente entre dos outo riba Kaya Gobernador N. Debrot. El a haña un prosèsferbal pa manehá sin seguro bálido.

Den oranan di anochi riba djamars 12 di sèptèmber a para un outo na Kaya Gepi despues ku un patruya a spòt e vehíkulo ku un lus di dilanti defekto. Despues di un kòntròl mas aleu a resultá ku e shofùr no tabata disponé di un reibeweis bálido ni seguro bálido. El a haña un prosèsferbal pa ámbos infrakshon i un atvertensia pa e lus di dilanti defekto.

Alrededor di 7.45 or di anochi riba djaluna 11 di sèptèmber a para shofùr di un skuter riba Kaya Nikiboko Sùit. E shofùr no tabatin un hèlm adekuá bistí. Despues di un kòntròl mas aleu e shofùr no por a mustra dokumentonan di seguro bálido. El a haña un prosèsferbal pa esaki i a bai ku e skuter warda di polis.

Aksidente den kadena

Alrededor di 4.30 or di atardi riba djaluna 11 di sèptèmber un aksidente den kadena entre tres vehíkulo a tuma lugá riba Kaya Korona. E vehíkulonan a dal tras di otro. Pasahero di un di e outonan enbolbí a resultá levemente heridá. Personal di ambulans a hasi un chekeo médiko na e sitio.

BròKèS 93.5 ………… Skuch’é!