Notisia di polis di djaluna 04 di sèptèmber te ku djaluna 11 sèptèmber 2023

Aksidente

Riba djaluna 11 di sèptèmber un aksidente a tuma lugá riba Kaya Macario (Cai) Sint Jago. Pa motibu deskonosí, e shofùr a pèrdè kòntròl i a bai dal den un palu di lus. Despues di e impakto e outo a bai para 50 meter mas leu. E shofùr, un yònkuman menor di edat, a resultá levemente heridá i personal di ambulans a trat’é na e sitio mes. El a haña un prosèsferbal pa motibu ku e no ta disponé di un reibeweis. E kompania di elektrisidat a bini na e sitio pa drecha e daño kousá na e palu di lus. Pa e motibu aki, koriente a bai den algun bario den besindario.

Ladronisia for di outo

Riba djaluna 11 di sèptèmber a drenta keho di ladronisia for di un outo. E outo tabata stashoná na Kaya Prinses Marie i no tabata na lòk. Entre djadumingu 10 di sèptèmber i djaluna 11 di sèptèmber, deskonosínan a bai ku algun pertenensia for di e outo. Ta investigando e kaso.

Dos outo na kandela

Den oranan di mardugá riba djaluna 11 di sèptèmber, ‘meldkamer’ sentral a haña notifikashon di dos outo ku tabata na kandela den kurá di un kas situá na Kaya Hulanda. Brantwer a bin na e sitio i a paga e kandela. No tabatin herido. Probablemente a pega e outonan na kandela. Ta investigando e kaso.

Si bo a mira òf tende algu ku por yuda ku e investigashon, e ora ei bo por mèldu esaki via 715 8000 òf via di e liña di tep anónimo 9310.

Detenshon pa maltrato

Riba djadumingu 10 di sèptèmber a detené un hòmber di inisial T.d.J. di 25 aña di edat en konekshon ku maltrato. E sospechoso a maltratá un dama.

Bringamentu ta kondusí na detenshon

Den oranan di mardugá 10 di sèptèmber a detené dos hòmber na un establesimentu di hóreka situá na Hanchi Amboina. A detené un hòmber di inisial B.I.D.S. di 25 aña di edat i un hòmber di inisial A.F.R. di 34 aña di edat. Nan tabata enbolbí den un bringamentu. A detené ámbos hòmber en konekshon ku maltrato.

Ladronisia for di akomodashon turístiko

Riba djasabra 9 di sèptèmber a drenta keho di ladronisia for di un akomodashon turístiko situá na Kaya Yuma. Deskonosínan a bai ku entre otro un tas di lomba pretu, un lèptòp di marka Acer Aspire ku su kargadó, un ‘Earpods’ marka Apple i sèn kèsh. E kas tabata na lòk pero e bentana di kushina tabata habrí. Ta investigando e kaso.

Detenshon pa menasa

Den oranan trempan di mainta a detené un hòmber di inisial J.S.G.M. di 20 aña di edat en konekshon ku menasa i insulto. Durante un intermediashon, e sospechoso a insultá polis i a menasá nan ku morto. Pa e motibu aki a detené.

Detenshon pa manehá bou di influensia di alkohòl

Den oranan di mardugá riba djasabra 9 di sèptèmber, alrededor di 3.45 or, a detené un hòmber di inisial K.M.R. di 35 aña di edat pa manehá bou di influensia di alkohòl. E sospechoso tabata enbolbí den un aksidente durante kua su outo a bai resultá den mondi riba Kaya Internashonal. A hasi un tèst di supla ku e shofùr pa motibu ku e no por a para riba su pianan i tabata papia ku lenga pisá. En konekshon ku e resultado di esaki, a detené e sospechoso.

Detenshon pa violashon di Lei di Identifikashon

Riba djasabra 9 di sèptèmber, alrededor di 2.45 or di mardugá, a detené un yònkuman di inisial L.H.E.N. di 16 aña di edat pa violashon di Lei di identifikashon BES. Un patruya a spòt e sospechoso ful na pretu ku un ‘hoodie’ bistí, ta kana kantu di kaminda riba Kaya Nikiboko Sùit. Na momentu ku e sospechoso a mira un outo di polis su tras riba kaminda, el a kuminsá kore. El a para na un kas i a tira algu afó. A dun’é òrdu pa identifiká su mes ku un prueba di identifikashon. E no por a kumpli ku esaki. Seguidamente a listr’é buskando su sédula. Aki a haña un laiter di kushina. A inisiá un búskeda pa haña loke ku el a benta afó i ta trata di un ‘balaklava’ koló pretu. Pa e motibu aki a detené.

Aksidente

Den oranan di atardi riba djabièrnè 8 di sèptèmber un aksidente entre un pikòp i un outo a tuma lugá riba Kaya Gramèl. Ambulans a transportá shofùr di e pikòp pa hòspital pa tratamentu médiko. A hasi un tèst di supla ku shofùr di e outo i a resultá ku e no tabata bou di influensia di alkohòl. Ambos shofùr tabatin nan dokumentunan na òrdu. A sera e kaya un ratu pa CRS por a hasi nan trabou trankil. Despues a habri kaya bèk.

Detenshon pa menasa ku morto ta kondusí na entrada hudisial

Riba djaweps 7 di sèptèmber, alrededor di 3 or di atardi, a detené un hòmber di inisial R.R.R.M. di 29 aña di edat en konekshon ku un kaso di menasa ku morto i pa destrukshon. E sospechoso a menasá dos persona ku morto i a destruí un vehíkulo. Relashoná ku e kaso aki, a tene un entrada hudisial na un kas situá den Antriol. Durante e entrada hudisial no a topa ku arma. A konfiská sèn kèsh, algun saku ku supstansianan paresido na narkótiko, un telefòn i un outo. E sospechoso tabata resistí fuertemente durante su detenshon.

Aksidente

Alrededor di 3 or di mardugá riba djaweps 7 di sèptèmber, ‘meldkamer’ sentral a haña notifikashon tokante un aksidente riba Kaya Nikita. Na yegada di e patruya a topa ku un outo bandoná mei mei di kaminda. Despues di un investigashon mas aleu a resultá ku e vehíkulo a dal den un muraya di betòn kantu di kaminda. Pa motibu di e impakto, e no por a sigui kore. Despues e shofùr a bandoná e sitio i laga e outo atras. A tou e vehíkulo i bai kuné for di e sitio.

Detenshon pa manehá bou di influensia

Den oranan di mardugá riba djaweps 7 di sèptèmber a detené un dama di inisial T.J.L. di 29 aña di edat pa manehá bou di influensia di alkohòl. E sospechoso tabata enbolbí den un aksidente riba Kaya J.N.E. Craane. Aki el a dal den dos otro vehíkulo ku tabata stashoná. Na yegada di e patruya a konstatá ku e dama tabatin wowo kòrá i tabata papia ku lenga pisá. Pa e motibu aki a hasi un tèst di supla kuné. En konekshon ku e resultado, a detené e sospechoso i a konfiská su reibeweis. Despues di un kòntròl mas aleu e no por a mustra dokumentunan di seguro bálido tampoko. Pa esaki el a haña un prosèsferbal.

Alrededor di 1 or di mardugá riba djárason 6 di sèptèmber a detené un hòmber di inisial G.J.P. di 48 aña pa manehá bou di influensia di alkohòl. Un patruya a spòt e shofùr na momentu ku e tabata kore zeilu riba Kaya Neerlandia ku su skuter. A dun’é òrdu pa para pa un kòntròl i a konstatá ku e tabata papia ku lenga pisá i tabatin wowo kòrá. Pa e motibu aki a hasi un tèst di supla kuné i en konekshon ku e resultado di esaki a detené e sospechoso. A konfiská su skuter i su reibeweis.

A bai ku pikòp warda di polis

Alrededor di 1 or di mardugá riba djamars 5 di sèptèmber un patruya a para un pikòp pa kòntròl riba Kaya Nikiboko Sùit. A spòt e vehíkulo sin plachi di number bálido na su bùmper dilanti. E shofùr no por a mustra dokumentonan di seguro bálido i despues di un kòntròl mas aleu a resultá ku el a haña un prosèsferbal algun dia anterior pa manehá sin seguro bálido. Pa e motibu aki a bai ku e vehíkulo warda di polis. E shofùr a haña prosèsferbal pa manehá sin plachi di number bálido i sin seguro.

Aksidente entre skuter i outo

Riba djamars 5 di sèptèmber, alrededor di 9 or di anochi, un aksidente entre un outo i un skuter a tuma lugá riba Bulevar EEG. E outo tabata kantu di kaminda i a subi kaya nèt na momentu ku un skuter tabata aserkando ku konsekuensia ku e skuter a bai dal den e outo. Ambulans a transportá shofùr di e skuter pa hòspital pa tratamentu médiko. Shofùr di e outo no por a mustra un reibeweis bálido i a haña un prosèsferbal.

Den oranan di mainta riba djaluna 4 di sèptèmber un aksidente a tuma lugá riba Bulevar EEG. Na yegada di e patruya a konstatá ku un skuter a dal tras di un outo. Shofùr di e outo a deklará ku e tabata kore direkshon sùit riba e kaya menshoná i a wanta brek na momentu ku e outo su dilanti kier a lora na man robes. Na e momentu ei e skuter a kore dal su tras. Pa e motibu aki shofùr di e skuter a resultá heridá. Ambulans a transport’é pa hòspital pa tratamentu médiko.

Ladronisia di bandera

Riba djamars 5 di sèptèmber a drenta keho di ladronisia di un bandera ku tabata pegá na un palu di lus na Kaya Internashonal. Ta trata di un bandera di Rusia. Riba djaluna 4 di sèptèmber, deskonosínan a bai ku e bandera. Ta investigando e kaso.

Aksidente entre skuter i kabritu

Alrededor di 6 or di atardi riba djaluna 4 di sèptèmber, un aksidente entre un skuter i un kabritu a tuma lugá riba Kaya Flor De Cuba. Pa e motibu aki e shofùr a resultá heridá. Ambulans a transport’é pa hòspital pa tratamentu médiko. E kabritu, ku no tabata marká na su orea, a fayesé.

Aksidente entre dos vehíkulo

Riba djaluna 4 di sèptèmber, alrededor di 11.50 or di mainta, un aksidente entre un djip i un outo a tuma lugá riba Kaya Internashonal. Pa motibu deskonosí e vehíkulonan a dal den otro. Ambulans a transportá shofùr di e outo pa hòspital pa tratamentu médiko.

BròKèS 93.5 ………… Skuch’é!