Notisia di polis di djabièrnè promé di sèptèmber te ku djaluna 4 di sèptèmber 2023

Ladronisia boto

Riba djadumingu 3 di sèptèmber a drenta keho di ladronisia di un boto ku e nòmber ‘Jammin’, ku number di registrashon NC6B, tipo ‘Boston Whaler 11 ft Sport’. Riba e boto tabatin tambe un motor di e marka ‘Yamaha Enduro’ pegá. E boto tabata stashoná na un kas den konstrukshon na Sabadeco Crown Park. Ta investigando e kaso.

Interkambio di palabra ta kondusí na detenshon

Den oranan trempan di anochi riba djadumingu 3 di sèptèmber a detené un hòmber di inisial J.E.M. di 56 aña di edat en konekshon ku destrukshon. E hòmber tabata enbolbí den un interkambio di palabra ku un otro hòmber na establesimentu di hóreka situá na Kaya Papa Cornes. Durante e interkambio di palabra, emoshonnan a subi pa kual motibu e sospechoso a destruí bentana di un outo ku un piedra.

Diferente detenshon pa manehá bou di influensia

Alrededor di 6.20 or di atardi riba djadumingu 3 di sèptèmber a detené un hòmber di inisial C.P.G. di 51 aña di edat na Kaya Bareta pa manehá bou di influensia. Un patruya a spòt un pikòp ku tabata kore ku velosidat haltu i ku dos flèt tayer. A par’é pa un kòntròl pero tambe pa motibu ku ta peligroso pa kore ku velosidat haltu i ku flèt tayer. E shofùr tabatin su dokumentonan na òrdu, pero por a sinti un holó fuerte di alkohòl. A hasi un tèst di supla ku e shofùr i a resultá ku e tabata bou di influensia di alkohòl. Pa e motibu aki a detené i a konfiská su reibeweis.

Riba djadumingu 3 di sèptèmber a detené un hòmber di inisial L.A.O.A. di 56 aña di edat pa manehá bou di influensia. E shofùr tabata kore zeilu riba Kaya Macario (Cai) Sint Jago i a resultá riba e banda kontrali di kaminda. Pa e motibu aki un patruya a par’é pa un kòntròl. Durante e kòntròl por a konstatá ku e shofùr tabatin wowo kòrá i pa e motibu aki a hasi un tèst di supla kuné. En konekshon ku e resultado di esaki a detené pa manehá bou di influensia di alkohòl.

Den oranan di anochi riba djadumingu 3 di sèptèmber a detené un hòmber di inisial R.J.M.O. di 35 aña di edat pa manehá bou di influensia di alkohòl. E sospechoso tabata enbolbí den un aksidente entre dos outo riba Kaya Korona. A hasi un tèst di supla ku shofùr di ámbos vehíkulo. En konekshon ku e resultado di esaki a detené e sospechoso.

Bringamentu ta kondusí na detenshon

Den oranan di anochi riba djasabra 2 di sèptèmber a detené un hòmber di inisial J.J.M. di 23 aña di edat pa manehá bou di influensia di alkohòl i un hòmber di inisial L.C.P.G. di 39 aña di edat pa maltrato ku un arma. Ambos sospechoso tabata enbolbí den un bringamentu na un establesimentu di hóreka situá na Kaya Neerlandia. Na yegada di e patruya, e sospechoso di inisial J.J.M. ya a bandoná e sitio i a par’é pa un kòntròl. Durante e kòntròl por a konstatá ku e sospechoso tabata papia ku lenga pisá i no por a para riba su pia. A hasi un tèst di supla kuné. Pa motibu ku e tabatin mancha di sanger riba su paña, a puntr’é kiko a pas’é. E sospechoso a deklará ku un otro hòmber a dal e ku bòter di serbes. Pa esaki e kier a entregá un keho. E sospechoso tabatin tambe un kap hundu na su man. Ambulans a bini pa e motibu aki na e sitio i a transportá e sospechoso pa hòspital pa tratamentu médiko. Despues a hiba e sospechoso warda di polis pa un análisis di rosea.

A detené e otro sospechoso di inisial L.C.P.G. na e sitio.

Detenshon

Riba djasabra 2 di sèptèmber, alrededor di 9 or di anochi, un patruya a spòt tres skuter riba e rotònde ku ta konektá Kaya Internashonal i Kaya Industria. E skuter mas patras no tabatin lus di patras i shofùr di e promé skuter no tabatin hèlm bistí. E patruya a duna nan señal pa para despues di kual dos skuter so a para. E skuter sin lus di patras a sigui kore. Riba esaki e patruya a kuminsá ku un persekushon i diferente bes a duna e shofùr òrdu pa para. Sin embargo e shofùr no a duna oido na esaki. E patruya na e momentu ei a bai kore banda di e skuter i a hasi uso di ‘pepperspray’. Aki e shofùr a bin para porfin riba Kaya Kanari. A detené e shofùr di inisial R.J.A.S.M. di 21 aña di edat pa no duna oido na òrdu di polis. A konfiská e skuter.

Ladronisia for di outo

Riba djasabra 2 di sèptèmber a drenta keho di ladronisia for di un outo ku tabata stashoná na Kaya Soeur Bartola. Entre 1 or i 3 or di mardugá, deskonosínan a bai ku dos brel di solo di marka Luis Vuitton, un oloshi di marka Invicta i un telefòn di marka Samsung S10. E outo no tabata na lòk. Ta investigando e kaso.

Detenshon pa buracheria públiko

Den oranan di mardugá riba djasabra 2 di sèptèmber a detené un hòmber di inisial M.A.A.V. di 63 aña di edat pa buracheria públiko. E sospechoso tabata drumi den su outo, ku tabata stashoná mei mei di kaminda riba Kaya Papa Cornes. Na yegada di e patruya a duna e hòmber òrdu pa baha for di den e outo. Aki por a konstatá ku e hòmber tabata papia ku lenga pisá, su aliento tabata hole alkohòl i e no por a para riba su pianan. E sospechoso no por a kumpli ku e tèst di rosea ku a pidié pa hasi. A hib’é warda di polis pa e sosegá. A hiba e outo tambe warda di polis.

Persekushon

Riba djabièrnè 1 di sèptèmber a konfiská un outo despues ku e shofùr no a duna oido na òrdu di polis. E shofùr a kore subi Kaminda Essequibo for di un kaya sin nòmber sin duna preferensia na un patruya di polis. Pa hasi un kòntròl rutinario a sende e lusnan óptiko (zwaailicht) pa para e shofùr. E shofùr a para pero despues a kore bai na momentu ku e agentenan a baha for di outo. Despues a sigui un persekushon kòrtiku. Riba Kaminda di Lac e shofùr a para atrobe pero a kore bai na pia den direkshon di Bario Nieuw Amsterdam. Aki e patruya a disidí di para e persekushon mirando e peliger ku por tin pa hendenan ku tabata den besindario. Na e sitio, un otro hòmber a mèldu su mes komo doño di e outo, pero e no por a mustra dokumentonan bálido. Pa e motibu aki a hiba e outo warda di polis.

BròKèS 93.5 ………… Skuch’é!