Notisia di polis di djabièrnè 28 di aprel te ku djárason 3 di mei 2023

Kandela den kas

Den oranan di mardugá riba djarason 3 di mei, ‘meldkamer’ sentral a haña notifikashon ku tin un kas na kandela den bario Santa Rosa. Brantwer ku a akudí na e sitio a paga e kandela. No tabatin hende den e kas. Algun ratu despues, ‘meldkamer’ sentral a haña dos notifikashon tras di otro di kandela den e mesun kas. Despues di ámbos notifikashon, brantwer a bai na e sitio pa paga e kandela. Un supliká ta bai na habitantenan di e bario Santa Rosa, pa tira bista riba muchanan pa no drenta e kas kimá en konekshon ku peliger ku e por kai den otro. Ta investigando kousa di e kandela.

Manehá miéntras reibeweis ta konfiská ta kondusí na detenshon

Riba djamars 2 di mei a detené un hòmber di inisial R.A.A.B. pa motibu ku e tabata manehá miéntras su reibeweis ta konfiská. Durante un kòntròl a konstatá ku e sospechoso tabata manehá un outo miéntras e tin un prohibishon pa manehá. A hiba e vehíkulo di e sospechoso warda di polis.

Detenshon pa manehá bou di influensia

Den oranan di anochi riba djamars 2 di mei, a detené un hòmber di inisial S.M.V.B. di 38 aña di edat na Kaya Dr. Jose G. Hernandez en konekshon ku manehá bou di influensia. Despues di un notifikashon ku a drenta na ‘meldkamer’ sentral, a para e shofùr pa un kòntròl i a hasi un tèst di supla kuné. A konsekuensia di e resultado a detené. A hiba e vehíkulo di e sospechoso warda di polis.

Den oranan di mardugá riba djaluna 1 di mei, a detené un hòmber di inisial C.L.S.M. di 18 aña di edat riba Kaminda Gurubu en konekshon ku manehá bou di influensia. A para e sospechoso despues ku a mir’e ta kore zeilu riba kaminda. Despues di un kòntròl a resultá ku e no tabatin reibeweis, e tabata manehá sin faha di seguridat bistí i e tabata manehá bou di influensia.

But pa diferente infrakshon

Riba djasabra 29 di aprel un patruya a spòt un ‘golfcart’ ku 5 persona aden riba Kaya Internashonal. Mesora a duna e shofùr señal pa para i despues di un kòntròl mas aleu a resultá ku e no tabatin un reibeweis. E shofùr a haña un prosèsferbal pa manehá sin reibeweis. A hiba e ‘golfcart’ warda di polis.

Riba djadumingu 30 di aprel dos shofùr a haña but. Un di nan pa motibu di manehá sin faha di seguridat bistí i e otro pa manehá sin reibeweis.

Aksidente

Alrededor di 2.15 or di atardi riba djasabra 29 di aprel, un aksidente entre un outo i un pikòp a tuma lugá riba Bulevar E.E.G. Ambulans a transportá pasahero di e pikòp pa hòspital pa tratamentu médiko.

===========================================

BròKèS 93.5 ………… Skuch’é!