KRALENDIJK - Segun doktor Willem Cecilia e moshon ku konseho insular a pasa den forma unánime pa hasi un investigashon riba integridat atministrativo pa loke ta trata otorgamentu di pèrmit i matenshon di lei i reglanan aktual ta prematuro i demasiado pisá.
Cecilia ta mustra riba e echo ku konseho insular enbèrdat tin e instrumento pa laga hasi un investigashon riba e manerakon kolegio ehekutivo ta ehekutá su maneho.
Pa medio di artíkulo 160 di WolBES Konseho Insular tin e instrumento aki na su disposishon pa fortifiká su trabou di kontrolá Kolegio Ehekutivo den ehersisio di su maneho. Pero normalmente ta hasi uzo di e instrumento poderoso aki solamente si presentá un susedido òf situashon ku tin un impakto finansiero òf soshal ekonómiko grandi riba nos isla.
Cecilia ta di opinion ku no por uza e instrumento aki sin mas i pa loko. Netamente den kuadro aki, e artíkulo pa hasi un investigashon òf un enkuesta, ta mará na un ordenansa ku Konseho Insulae mester kompilá i aprobá. Den e ordenansa mester bin spesífikamente kiku ta bai investigá i na ki manera esaki lo bai tuma lugá. E ordenansa mester keda publiká i mester karga aprobashon pasivo di tantu gezaghèber komo minister di asuntunan di Interior i Reino.
Loke tambe mester sosodé segun Cecilia ta ku mester reservá medio finansiero riba presupuesto, i kual solamente por sosodé pa medio di un kambio di presupuesto ku tambe mester kana su trayekto.
Cecilia ta mustra tambe ku e komishon ku mester hasi e enkuesta no ta stòp di èksistí despues di elekshon. Miembronan di e komishon mester ta miembro di Konseho Insular. Si nan no keda elegí otro aña, nan lo keda remplasá den e siguiente periodo legislativo di konseho insular. Esaki ta otro indikikashon kon pisá e prosedura di un enkuesta ta.
Mas aleu segun Doktor Willem A. Cecilia, tin otro instrumento na disposishon di konseho insular manera hasi pregunta por eskrito dirigí riba echonan verifiká. Realmente a drenta serka gezaghèber, ku ta e wardiante di bon gobernashon, kehonan di integridat??? Cecilia ta puntra su mes. Kuantu nan ta?
Tin sospecho ku Kolegio Ehekutivo ta tene informashon di presunto violashon di integridat atras? Kon a para ku e maneho di integridat di gobièrnu? No mas ku na aña 2020 e büro ‘Integridat i Gobernashon Internashonal’ a hasi un investigashon pa loke ta e doshénan di traspaso na Bonaire Holding. Cecilia ta puntra; Dikon Konseho Insular no kana e kaminda ei?
Ora hasi uzo di un instrumento pisá asina semper mester hasi un investigashon preliminar promé. E investigashon preliminar mester produsí konklushonnan di tal forma ku ta hustifiká pa hasi uzo di artíkulo 160 di WolBES. Mester averiguá si kolegio ehekutivo den su totalidat a faya den maneho di integridat i ku gezaghèber a faya den su funshon komo wardiante di integridat.
Por último Cecilia ta konsehá Konseho Insular pa realmente studia e proseso di e instrumento pa hasi un investigashon un biaha mas di aserka. Preferiblemente instalá un komishon di preparashon ku lo mester konsehá si ta hustifiká pa hasi uzo di artíkulo 160 di WolBES i si ta asina, e komishon di preparashon mester formulá e pregunta di investigashon mas konsiso i kòrtá riba e resultadonan di e investigashon prelimar i presentá un ordenansa den konsepto pa aprobashon Doktor Willem A. Cecilia ta terminá.
=========================================== BròKèS 93.5 ………… Skuch’é! https://www.radio935bonaire.com http://radio.garden/listen/bro-ke-s-93-5-fm-boneiru/a1YG6S77 https://www.basilachill.com/#!radio/radiobrokes http://brokes935fm.radiostream123.com https://liveonlineradio.net/radio-brokes-935-Radio BròKèS 93.5 Boneiru
.png)
