Minister Robbert Dijkgraaf di Enseñansa, Kultura i Siensia a bishitá DCNA

Minister Robbert Dijkgraaf di Enseñansa, Kultura i Siensia a bishitá DCNA pa interkambiá di idea tokante siensia na Hulanda Karibense

Riba djabièrnè 20 di yanüari 2023 minister di Enseñansa, Kultura i Siensia, señor Robbert Dijkgraaf, a hasi un bishita na ofisina di Dutch Caribbean Nature Alliance (DCNA) na Boneiru. Despues di un ‘meet & greet’ ku e empleadonan, DCNA a haña oportunidat pa pone énfasis riba importansia di investigashon i monitoreo, organisashonnan lokal di protekshon di naturalesa i trahamentu huntu pa salbaguardá naturalesa den e parti karibense di Reino Hulandes.

Arno Verhoeven, direktor di DCNA, a enfatisá ku entre e 6 islanan di Hulanda Karibense ainda tin masha tiki laso di kolaborashon i ku e motibu mas prinsipal di trabou di DCNA ta na promé lugá debí na un komprenshon mutuo di naturalesa i e deseo pa kompartí konosementu. ‘En realidat Hulanda Karibense ta disponé di hopi, ora ta trata di siensia i investigashon. Tur e hendenan pashoná akí ku ta traha riba preservashon di naturalesa riba nos islanan tin ún kos komun: nan pashon pa protehá naturalesa. I naturalesa ku no konosé frontera. E konosementu i abilidatnan ku nan ta akumulá den e ret akí ta enorme. I nan disposishon pa kompartí ta forma parti di e pashon akí. Ku 6 organisashon grandi di naturalesa nos ta un sentro di konosementu regional importante’, segun Verhoeven.

Hulanda Karibense ta hospedá hopi espesie úniko di bestia i mata. Hopi di esakinan ta bou di menasa pa motibu di pèrdida di nan habitat, kontaminashon i komementu eksesivo i e impakto di espesienan invasivo, kambio di klima i otro faktornan di strès. Pa manehá e rekursonan natural na nos isla den un forma inteligente i sostenibel, konosementu tokante e ekosistemanan kompleho i vulnerabel na Hulanda Karibense ta esensial. Prinsipalmente ora e medionan akí mester keda sostené e komunidatnan lokal i forma e base pa bienestar ekonómiko di e islanan. Den esaki investigashon, monitoreo

i komunikashon i alkanse ta hunga un ròl krusial. Siensia ta un komponente fuerte di kada programa di naturalesa i na momentu di buska mas finansiamentu e ta un di e partinan mas importante di kada aplikashon.

DCNA ta un organisashon non-profit ku nan a lanta pa protehá e ambiente natural i pa promové maneho sostenibel di rekursonan natural, tantu riba tera komo den laman, riba e seis islanan hulandes karibense. E aliansa ta traha huntu ku organisashonnan lokal di maneho di parke i otro organisashonnan di protekshon di naturalesa. E ta un representante tambe pa parkenan lokal na momentu di kontakto ku gobièrnunan i trahadónan di maneho òf kontakto ku organisashonnan regional òf internashonal na nivel multi-insular.

Un di e tareanan núkleo di DCNA ta promoshon i fasilitashon di diálogo, interkambio di konosementu, entrenamentu i kolaborashon permanente entre organisashonnan di maneho di parke (e parkenan). DCNA's Research & Monitoring Working Group (DCNA su grupo di trabou pa investigashon i monitoreo) ta ofresé un plataforma kaminda biólogonan di e parkenan ta bini huntu pa kompartí eksperensia, konosementu i konseho riba tereno di investigashon i monitoreo. E grupo akí ta traha entre riba harmonisashon sientífiko di protokòlnan sólido di monitoreo pa e indikadónan mas importante di biodiversidat (espesie i habitat), instrumentonan pa análisis i un strategia pa guia investigadónan (i finansiadónan) na momentu di formulashon i ehekushon di investigashon i monitoreo na Hulanda Karibense.

‘Nos ta sostené investigashon i monitoreo na Hulanda Karibense tambe pa medio di yuda mehorá komunikashon i alkanse. Por ehèmpel nos ta hasi informashon sientífiko mas amplio via Dutch Caribbean Biodiversity Database (DCBD). Nos ta agradesido na ministerio di Agrikultura, Naturalesa i Kalidat di Kuminda pa nan sosten pa e trabou akí’, segun Tineke van Bussel, Liaison di Investigashon i Komunikashon di DCNA.

‘Komo ret regional ku ta kubri Hulanda Karibense i ku un relashon di trabou duradero ku e komunidat lokal di protekshon di naturalesa, DCNA ta den un posishon úniko pa kontribuí na desaroyo i implementashon eksitoso di inisiativanan sientífiko den region. Nos ke fortifiká nos trabou komo sentro di konosementu regional i gustosamente nos lo ke yama bon biní na mas medio pa duna servisio na nos stakeholdernan’, asina Arno Verhoeven a splika.

===========================================

BròKèS 93.5 ………… Skuch’é!