Kontratista A Violá Protokòl di Siguridat di WEB i Hasi Daño na Kabel di Koriente

Djasabra 20 di aprel un kontratista ku tabata hasiendo trabounan di ekskavashon pa un partido eksterno 'pa kibokashon' a hasi daño na un kabel di alto vòltahe bou di tera.

Pa e motibu aki, Water- en Energiebedrijf Bonaire (WEB) a hañ’e obligá ta hasi interupshon kontrolá di koriente pa evitá un fayo total di suministro di energia i pa kual vários bario a sufri molèster. Empleadonan di WEB a keda traha te den oranan lat di anochi pa drecha e kabelnan dañá i restablesé e suministro di koriente kompletamente.

Pa WEB ta esensial ku kontratistanan tene nan mes estriktamente na e zonanan marká ku ta establesé den e pèrmit. E kontratista en kuestion a desvia di e área pa kua el a risibí pèrmit pa traha. A viola prokòlnan di siguridat, kousando ku WEB mester a tuma e akshonnan ariba menshoná. Esaki por tabatin konsekuensianan fatal, kual, afortunadamente, no a sosodé den e kaso aki.

Den e pèrmit pa hasi trabounan di ekskavashon ta eksigí ku mester koba un buraku di prueba, pa verifiká e lugá eksakto di e kabelnan i tuberíanan bou di tera, promé ku kuminsá ku e trabounan di ekskavashon real.

WEB ta ofresé sdiskulpá pa e inkonvenensia kousá i ta sigui komprometé pa prevení ripitishon di situashonnan similar.