Konseho di Minister di Reino a disidí di no duna Aruba un instrukshon pa aña 2022. Un mihó
resultado inesperá ta buta ku e défisit ta yega na 112,7 mion Florin Arubano (AWG); 53 mion euro.
Ku esaki e défisit ta keda bou di e 131 mion AWG palabrá i pa e motibu ei un instrukshon no ta
nesesario e aña aki.
E mihó resultado di Aruba a sali na kla despues di e konseho di Kolegio Supervishon Finansiero di
Aruba (College Aruba Financieel Toezicht, CAft). Riba 13 di yüli CAft a konsehá Konseho di Minister di
Reino pa duna Aruba un instrukshon pa motibu ku gobièrnu di e pais no tabatin su presupuesto
balansá. CAft no a nota paso pa trese mas balanse den gastu i entrada di e pais i segun CAft Aruba no
ta hasi sufisiente pa drecha su situashon finansiero pa término largu.
“Ta bon ku gobièrnu di Aruba na último momento a presentá algun mihó resultado ku ántes tabata
spera i asina tene e défisit riba su presupuesto pa e aña aki bou di e límite palabrá”, asina Sekretario
di Estado Alexandra van Huffelen di Relashonnan den Reino ta indiká. “Ku esaki a evitá un
instrukshon pa 2022.”
Pero ainda e Sekretario di Estado i gobièrnu Hulandes ta preokupá pa futuro di e pais i di
Rubianonan. “Nos ta mira ku Aruba ta mantené debe grandi, mas di 90 porshento di e ‘Bruto
Binnenlands Product’ (BBP). Esaki mester baha ku mitar. Kasi 19 porshento di e presupuesto awor ta
bai na pago di interes. Ta sèn ku bo lo ke invertí den enseñansa, salubridat òf kombatimentu di
pobresa; kos ku ta importante pa e hendenan den e pais.”
Den Konseho di Minister di Reino a palabrá anteriormente ku otro aña e pais mester tene su mes na
e reglanan presupuestario atrobe. E reglanan aki ta indiká ku Aruba mester tin un surplus di 1
porshento di e BBP. Na 2023 Aruba no por hasi un apelashon mas riba fiansa di emergensia manera
durante periodo di corona, e asina yamá sosten di likides. “Pa konstruí un pais i mantené konfiansa di
e merkado finansiero, ta importante pa tin un presupuesto ku ta kuadra. Ku un debe di 5,8 mil mion
AWG Aruba ta duna futuro generashon un peso enorme pa karga. Pa e motibu ei ta sumamente
importante ku e presupuesto ta kuadra ku e palabrashonnan hasí i ku tin sèn pa tur lokual
Rubianonan ke pa nan pais”, asina e Sekretario di Estado ta bisa.
Na nòmber di e gabinete, e Sekretario di Estado a manda un karta pa gobièrnu di Aruba pa pone
gobièrnu na altura di e desishon di Konseho di Minister di Reino. Den e karta ta hasi menshon tambe
di remplaso di e fiansanan di likides eksistente pa fiansa nobo, e asina yamá refinansiamentu. Esaki
mester sosodé otro aña. Den e karta ta menshoná ku un presupuesto balansá, konektá na un
ehekushon konfiabel i supervishon finansiero adekuá pa medio di e lei di konsenso Aruba financieel
toezicht (RAft), ta esensial pa por drenta den diálogo ku otro tokante e tópiko di refinansiamentu di
debe.
===========================================
BròKèS 93.5 ………… Skuch’é!