Komentario Arthur Sealy; Grupo Di Diálogo Boneiru, Huntu Ku Otro Islanan i Sürnam Ku E Tarea Di Investigá Impakto Di Sklabitut

Den e aña di konmemorashon di abolishon di sklabitut Grupo di Diálogo Boneiru ta forma

huntu ku e otro islanan i Sürnam un plataforma pa sigui ku e tarea di investigá impakto di

sklabitut riba aktual komunidatnan.

Tantu minister presidènt Mark Rutte komo Rei Willem Alexander a pidi diskulpa i tambe pa pordoná Hulanda. Tabata Grupo di Diálogo Boneiru promé ku Marka Rutte i Willem Alexander a enfatisá ku pordon ta esensial pa riba base di igualdat hiba kombersashon ku Hulanda. Tópikonan ta; diskriminashon, rasismo I kolonialismo.

E punto di salida di e islanan i Sürnam ta; duna direkshon na e kombersashonnan i no Hulanda. E motibu ta sintá den e echo ku realidat sosial di kada isla i Sürnam ta distinto. Un realidat ku sigur ta konsekuensia di sklabitut, diskriminashon, rasismo i kolonialismo.

Grupo di Diálogo Boneiru ta formulando, a base di kombersashon di mesa ku komunidat i charla tokante trouma, un posishon basá riba argumento ku no ta basá riba rasa, sekso i orientashon seksual. Komunidat boneriano ta dividí polarisá i kategorisá, ekonómikamente, polítikamente i den enseñansa.

E kambio drástiko ku ta obligá Boneiru kompletu pa hasi ta, eliminá asuntu di kultura i identidat den kombersashonnan. Si no hasi esaki nos ta mes malu i kruel ku e doño di katibu. Ta imposibel pa keda mira e grupo na kua supuestamente nos ta pertenesé.

Kiko nos ke? Pa tin un komunidat basá riba tribu, blanku, pretu i hel? Di e forma aki nos ta kontinuá ku divishon i segregashon i rebibá sklabitut.

Nos no ta miembro di ningun tribu. A base di pensamentu nos tin e deber di kontribuí na un komunidat liber unda ta reina igualdat.

Arthur Sealy

BròKèS 93.5 ………… Skuch’é!