Durante e reunion di Konseho Insular di 24 di òktober 2023 e partnernan di koalishon Demokrat, M21 i frakshon Vrolijk a anunsiá ofisialmente kua ta e diputadonan ku lo keda instalá. E diputadonan ta sr Clark Abraham, sra Anjelica Cicilia i sra Nina den Heyer. E mes anochi Clark Abraham i Anjelica Cicilia a huramentá komo diputado. Dentro di poko Nina den Heyer ta huramentá komo diputado despues di finalisashon di su trabou aktual na OCW (Enseñansa, Kultura i Siensia).
E nombrashon i huramentashon ta en konekshon ku e petishon di e partnernan di koalishon di dia 20 di òktober 2023. A tuma tur e pasonan nesesario, inkluso investigashon di kredensial. Den e petishon ta referí tambe na e akuerdo di koalishon, kaminda tin pará ku e gobièrnu nobo na un manera hustu i duradero ke hasi e diferensia pa habitantenan di Boneiru.
Durante e promé reunion di Kolegio Ehekutivo, konforme artíkulo 2 di e Reglamentu di òrdu, a stipulá e repartishon di kartera komo lo siguiente:
Gezaghèber:
Òrden Públiko i Siguridat;
Kombatimentu di kalamidat;
Elekshon.
Diputado Clark Abraham:
Direktorado di Maneho i Sosten;
Direktorado di Supervishon i Mantenshon di Lei;
Bienestar di Animal;
Asuntunan Ekonómiko, inkluyendo Turismo;
Maneho di Deporte i asuntunan deportivo.
Diputado Anjelica Cicilia:
Direktorado di Planifikashon i Desaroyo
Diputado Nina den Heyer:
Direktorado di Komunidat i Kuido
Na momentu di ousensia di un di e mandatarionan e remplaso ta reglá di e siguiente forma:
Na momentu di ousensia, diputado Clark Abraham ta remplasá diputado Anjelica Cicilia. Diputado Anjelica Cicilia ta remplasá diputado Nina den Heyer. Diputado Nina den Heyer ta remplasá diputado Clark Abraham, kaminda gezaghèber ta e remplasante pa Supervishon i Mantenshon di Lei.
BròKèS 93.5 ………… Skuch’é!
.png)
