Ta fasil kondena un kriminal, den e kaso aki un ladron, si nunka bo tabatin ku enfrenta un situashon sufisientemente grabe pa komete krimen ku parse ta e úniko solushon. Kaminda otro nan lo a yama polis, gerente di un supermarket Radzuan Ma’asan di Malasia a mira un pober hòmber ku nesesidat.
Nan a gara e hòmber hòrtando fruta i bebida di un supermarket. Pero na luga di hui of nenga e akusashonan, e hòmber a konfesa mesora splikando ku e tabata trata di hòrta kuminda paso su yunan tabatin hamber. “Nunka ma yega di konose un ladron ku a admiti kulpa fasilmente, e la konta nos tambe ku e no por traha paso e tin ku kuida su 3 yu nan”, Radzuan a konta.
E èks ladron a konta Radzuan ku e la stòp di traha pa kuida su yunan despues ku su kasa a kai den koma debí na komplikashon di parto. Na momentu di skucha e situashon difísil di e hòmber, Radzuan tabata sa ku e no por a informa outoridat, na su luga e la ofrese e èks ladron un trabou, ayudo finansiero i yud'é inskribi su yunan na skol.
===========================================
BròKèS 93.5 ………… Skuch’é!
.png)
