Meta final di Fundashon Alzheimer Bonaire ta mehorá kalidat di bida di esnan ku ta biba ku demensia i vigilá kalidat di kuido pa e grupo akí. Pa aportá na e kuido spesial akí i aportá na konosementu di tur ku ta duna kuido na e grupo akí, Fundashon Alzheimer Bonaire a iniisiá djárason 17 di mei un kurso spesial pa esnan ku ta traha ku personanan ku ta biba ku demensia.
Djárason mainta Sr. Evert Piar, presidente di Fundashon Alzheimer Bonaire, a hasi apertura di e kurso Veder Methode ku no ta algu nobo pa Boneiru pasobra ya tin un grupo ku a sigui esaki on line i a pasa esaki ku éksito den temporada di pandemia.
Nobo den e kurso akí ta ku Sra Maria Westra, direktor di Theater Veder Nederland lo ta personalmente na Boneiru pa duna e kurso na un grupo mas grandi ku ta enserá partisipantenan di Zorg en Welzjn Groep, Sentro Akseso, FKPD i Kalor di Hogar.
Pa Boneiru e kurso akí ta unu inovativo, na momento ku partisipantenan ta siña atendé ku personanan ku ta biba ku demensia pa medio di aktividatnan teatral, un método ku ta pone e persona ku ta biba ku demensia sintié komfortabel.
E kurso lo tuma lugá den sala di reunion di Fuhikubo i ta konkluí 16 di yüni, na momento ku partisipantenan risibí nan sertifikado.
Djabièrnè dia 19 lo tin tambe un anochi di informashon tokante e método nobo akí den sala di reunion di Captain Don’s Habitat di 7 or pa 8:30 pm i ku lo ta na enkargo di Maria Westra di Theater Veder Nederland.
E anochi akí ta gratis i ta pa tur interesado.
Fundashon Alzheimer Bonaire ta deseá tur 16 partisipante éksito ku e kurso i ku e personanan ku ta biba ku demensia lo tin probecho di esaki.
BròKèS 93.5 ………… Skuch’é!
.png)
