EMBAHADOR DI UNION OROPEO RENE VAN NES TA FORTIFIKÁ KOLABORASHON NA BONEIRU, KOMPAÑÁ PA ENTIDAT PÚBLIKO BONEIRU I INTERNATIONAL DESK BONAIRE (IDB)
Durante un seri di bishita ku a tuma lugá di 4 pa 6 di sèptèmber 2023, Rene Van Nes, embahador di Union Oropeo pa Guyana i Sürnam i responsabel pa e Paisnan i Teritorionan Ultramar (OCT’s) Aruba, Boneiru, Kòrsou, Saba, Sint Eustatius, Sint Maarten i Sint Barths a fortifiká e relashonnan entre Union Oropeo i Boneiru. E seri di bishita akí ku Entidat Públiko Boneiru a organisá ku sosten di International Desk Bonaire a tira lus riba asuntunan importante i riba posibilidatnan pa e isla.
Dia 4 di sèptèmber, Representante di Union Oropeo Van Nes tabata di bishita na e planta di purifikashon di awa (RWZI) di Water- en Energiebedrijf Bonaire (WEB). Durante e bishita na e planta di purifikashon di awa, a tene algun presentashon tokante purifikashon di awa, e vishon di WEB i resultado di e sosten ku Union Oropeo ta duna na WEB.
Riba 5 di sèptèmber Van Nes a topa ku Kolegio Ehekutivo di Boneiru. E kòmbersashonnan a enfoká riba e kolaborashon entre Union Oropeo i Boneiru, kolaborashon ku otro islanan i uso di fondonan oropeo.
Riba e mesun dia, Van Nes, a hasi un bishita serka Enviado Spesial Edison Rijna, kaminda e deliberashonnan a bai tokante e futuro kolaborashon, rekoudashon di fondo oropeo pa Boneiru i e proyektonan ku ya kaba ta haña sosten di Union Oropeo.
Van Nes a bishitá tambe e palunan di mangel di Lac, kaminda el a ekspresá su apresio pa STINAPA su dedikashon na konservashon di naturalesa. Akí e representante a haña sa mas tokante e proyekto ‘Lac Pa Semper’, ku ta enfoká riba rekreashon sostenibel, rekuperashon di koral i kama di yerba di laman, mihó mantenshon di lei i edukashon di komunidat. Ehekushon di e proyekto ta den kolaborashon ku e programa di “Resilience, Sustainable Energy, and Marine Biodiversity’’ (RESEMBID) i ta kontribuí na preservashon di Lac i e palunan di mangel ku ta rondon’é. Van Nes a hasi tambe un paseo informativo den boto ku e rangernan di STINAPA, kaminda el a eksplorá e diferente tiponan di mondi di palu di mangel i kaminda el a mira e esfuersonan ku STINAPA ta hasi pa koba kanal nobo.
E bishita akí a enfatisá e importansia di preservashon di Boneiru su naturalesa i e esfuerso ku organisashonnan manera STINAPA ta hasi pa logra esaki ku sosten di Union Oropeo. Loke tambe a destaká ta e kolaborashon entre STINAPA i Entidat Públiko Boneiru via International Desk Bonaire. E bishitanan a pone énfasis riba e kolaborashon entre Union Oropeo i Boneiru i a suprayá e esfuersonan pa protekshon di medio ambiente i naturalesa. E Representante di Union Oropeo Van Nes a enfatisá e disposishon di Union Oropeo pa traha huntu i duna sosten na Boneiru i e otro islanan den region.
RESEMBID ta un programa ku 47 proyekto, ku Union Oropeo ta finansiá i Expertise France ta ehekutá – Expertise France ta e agensia di kolaborashon pa desaroyo di gobièrno Franses. RESEMBID ta sostené esfuersonan riba tereno di desaroyo humano sostenibel den 12 Pais i Teritorio Ultramar (OCT’s) den Karibe: Aruba, Anguilla, Boneiru, Islanan Bírgen Britániko, Islanan Kaiman, Kòrsou, Montserrat, Saba, Sint Eustatius, Saint Barthélemy, Sint Maarten i islanan Turks i Caicos.
Tokante International Desk Bonaire (IDB)
Vários programa di Union Oropeo i Nashonnan Uní ta ofresé hopi oportunidat pa Boneiru riba tereno di desaroyo di konosemento i sosten finansiero, tantu pa Entidat Públiko Boneiru komo pa esnan interesá den komunidat boneriano. Pa e motibu akí for di 1 di yüli 2022 a establesé un ofisina internashonal ku ta kai bou di Gabinete di Gezaghèber, kende ta fungi komo “Territorial Authorised Officer” (TAO) di Boneiru pa Union Oropeo.
International Desk Bonaire ta un entidat organisatorio di Gabinete di Gezaghèber, i e tin komo inisiativa pa suministrá i kompartí informashon tokante fondonan Oropeo i otro fondonan internashonal ku ta disponibel pa Boneiru.
BròKèS 93.5 ………… Skuch’é!
.png)
