Departamentu di krímen sibernétiko di KPCN ta atvertí pa ‘Sextortion’

Den e temporada tras di lomba e departamentu di krímen sibernétiko di Kuerpo Polisial Hulanda Karibense a risibí vários notifikashon tokante ‘Sextortion’.

Kiko ta ‘Sextortion’?

‘Sextortion’ ta chantahe ku un potrèt òf vidio ku tendensia seksual, di e víktima. Esaki por ta un potrèt òf vidio sunú di e víktima, pero e por ta tambe imágen di ‘webcam’ ku ta adaptá di tal manera ku ta mustra manera ku víktima ta teniendo relashon ku un menor di edat, pa asina por chantagiá ku ponementu di esaki ‘online’. Esun ku ta chantagiá mayoria biaha kier sèn òf mas potrèt òf vidio pikante di e víktima. Hopi biaha ta trata di potrèt òf vidio hòrta via medio sosial, meil, dor di tuma ofer un ‘webcam’ òf dor di hòrta aparatonan. Pa ‘Sextortion’ bo por hasi denunsia.

Kiko bo por hasi kontra ‘Sextortion’?

• No reakshoná riba e menasanan.

• Na momentu ku bo hasi loke pidi bo, e persona por sigui chantagiá bo. No ta un garantia ku e chantahe ta stòp ora bo hasi loke pidi bo.

• Kolekshoná mas tantu prueba posibel.

• Esaki por yuda bo si bo bai polis mesora òf despues. Saka mas tantu ‘screenshot’ posibel di e mensahenan ku bo risibí. Tin algu fèrfelu di bo online? Saka ‘screenshot’ di esaki i sòru ku e adrès di wèpsait (e URL) ta visibel.

• Kita (delete) i blòkia e persona tur kaminda.

• Bo a topa bo potrèt online? E ora ei tuma kontakto mas lihé posibel ku e wèpsait ei. Hopi biaha te abou riba e wèpsait bo ta haña un lenk pa bai na ‘help’, ‘abuse’ òf ‘contact’. Splika den bo meil ku por mira un potrèt di bo riba e wèpsait i ku bo no a duna pèrmit pa pone eiriba.

• Paga tinu, mayoria wèpsait ta na Ingles, pues ta mihó pa skirbi bo meil na Ingles.

• Notifiká polis via cybercrime@politiecn.com

Tep pa prevení ‘Sextortion’

• Kompartí informashon priva lo ménos posibel online.

• Protehá bo profil di medio sosial kontra deskonosí i instalá otro konfigurashon di privasidat bon. Bou di esaki ta kai tambe sigurá bo potrèt nan.

• Usa un ‘alias’ òf ‘nickname’ na lugá di bo mes nòmber riba wèpsait nan di date òf di profil. Esaki ta hasié difísil pa estafadornan por haña sa bo identidat i pa yega na bo famia, amigu òf bo koleganan.

• No aseptá petishon pa amistat (friend request) òf petishon pa sigui bo (follow request) di personanan ku bo no konosé.

• No klek sin mas riba lenknan i no habri anekso, si bo no konosé esun ku a mand’e (bon) òf si bo ta ferwagt di risibí un anekso.

• Indiká bo límitenan klaramente, por ehèmpel ku bo no ta manda potrèt sunú.

• Bisa ‘no’ na petishonnan na kua bo no ke partisipá.

Mas informashon?

Manda un meil na cybercrime@politiecn.com òf yama 715 8000 i puntra pa e departamentu di krímen sibernétiko (cybercrime).

BròKèS 93.5 ………… Skuch’é!