BonKarate ku bon prestashon na Santiago, Chile

Djadumingu 20 di ougùstùs, un delegashon di BonKarate bou di guia di Sensei Peter Silberie i Thuersten Winklaar komo coach a sali pa Santiago Chile pa kompetí den e kampionato Panamerikano di Karate junior.

Na e kampionato aki a kompetí un total di 915 karateka di 24 pais. Apesar ku e temperatura tabata hopi friu debí ku ta final di winter na Chile, tòg e atletanan di Boneiru a sabi di kompetí na un nivel hopi haltu. Raiza Wilsoe tabata e promé ku mester a bringa i despues di a gana su promé pelea el a pèrdè su di 2 pelea pa desishon di rèfri. Esaki debí ku e skor tabata 0-0. Komo tal el a kai afó i keda den e promé 16 karatekanan. Despues Esther de Jesus tabata na turno i Esther tambe meskos ku Raiza a sòru di gana su promé pelea i a pèrdè su di dos pelea.

Mester apuntá ku e friu tabata un faktor hopi grandi pa mayoria di atleta na Santiago.

Pa duna un ehèmpel, den e sala di kompetensia, huma ta sali for di boka di tur hende ora ku ta papia. Pero asina mes tantu Raiza komo Esther a demonstrá nan persiveransia i madures deportivo i a duna bataya formal. Komo tal sensei Silberie i coach Thuersten Winklaar tabata hopi satisfecho di e kombatenan di e dos atletanan.

I ademas a sòru di sobresalí atrobe komo Boneiru den e 24 paisnan. Hopi atleta di e diferente paisnan a bin papia ku e delegashon di Boneiru, kaminda e promé pregunta semper ta, na unda Boneiru ta keda! Di aki semper ta mustra pòtrèt i splika na unda Boneiru ta ubiká. Despues di un bon splikashon tur ku ta puntra ta keda impreshoná i ku gana di konosé Boneiru. Pero tambe hopi hende ta keda impreshoná di e echo kuantu hende ta biba riba e isla di Boneiru i ku asina mes e karatekanan ta kompetí bon asina. Korda ku nan no por kompetí más ahinda manera mayoria di pais grandi.

Di akuerdo ku Sensei Silberie a splika tambe ku debí na e eskala chikitu i e preisnan haltu di avion ta hopi karu pa sali for di Boneiru i esei por ta un opstákulo, pero pa bira kampion mester surpasá tur opstákulo!

No matter what!!!

Un danki grandi ta bai pa Maduro & Curiel’s Bank Boneiru ku a aportá en grande p’asina por a hasi e biahe aki posibel.

BròKèS 93.5 ………… Skuch’é!