Akshon di KPCN riba Kaya Ir. Randolph Statius van Eps

Riba djadumingu 3 di sèptèmber, alrededor di 6.45 or di atardi, Kuerpo Polisial Hulanda Karibense a tene un akshon riba Kaya Ir. Randolph Statius van Eps (kaminda di Sorobon) relashoná ku molèster di zonido kousá pa pustamentu ilegal i ponementu di ‘fever’ riba e kaminda aki. Durante e akshon, polis a sera e kaya na ámbos banda i a kontrolá shofùrnan riba dokumentonan konserní. Polis a bai warda di polis ku sinku (5) outo, sinku (5) skuter i kuater (4) bròmer. Esaki ta nifiká ku e doño por haña su vehíkulo bèk despues ku e por mustra e dokumentonan konserní.

Banda di esaki a konfiská dos skuter i un bròmer. Esaki ta nifiká ku e doño por haña su vehíkulo bèk despues ku terminá ku e investigashon i ku e doño por mustra e dokumentonan konserní. E kosto di tou e vehíkulo lo ta riba kuenta di e shofùr.

Kuerpo Polisial Hulanda Karibense ta hasi un yamada na un i tur ku ta partisipá na pustamentu ilegal i fevermentu, pa no partisipá na e aktividatnan aki riba karetera públiko. Polis lo sigui tene e tipo di akshonnan aki pa garantisá seguridat di tur partisipantenan den tráfiko. Bo no ke pèrdè bo vehíkulo? No partisipá na e tipo di aktividatnan ilegal aki.

BròKèS 93.5 ………… Skuch’é!