Washington Slagbaai National Park ta kontentu di anunsiá su transishon pa un sistema di pago sin sèn efektivo, komo parti di un plan stratégiko pa mehorá e eksperensia di e bishitantenan i simplifiká e proseso di registrashon. For di 1 di sèptèmber 2023 e parke lo kuminsá un transishon gradual pa implementashon total sin sèn efektivo pa 2024.
E transishon gradual ta pa garantisá ku bishitantenan tin sufisiente tempu pa adaptá na e sistema nobo di pago, i na mes momento, disfrutá di e komodidat i efisiensia ku ta ofresé. Durante e periodo di transishon akí, ta aseptá opshonnan di pago kèsh i di pago elektróniko, permitiendo bishitantenan pa kustumbrá. E aserkamentu akí ta pa fasilitá un eksperensia rápido i sin komplikashon pa tur bishitante di e parke.
"Ku e introdukshon di e transishon gradual di pago akí pa yega na pago kompletamente sin sèn efektivo, nos ta pone prioridat na e komodidat i satisfakshon di nos bishitantenan", e manager di e parke, Albert Christian, a splika. "Nos meta ta pa hasi e transishon mas sin interupshon posibel, segurando ku bishitantenan por sigui eksplorá e parke sin interupshon miéntras nan ta adaptá gradualmente na e sistema sin sèn kèsh."
Washington Slagbaai National Park ta keda dediká na su inisiativanan duradero.
Avansando pa un sistema di pago sin sèn efektivo, e parke tin komo meta pa redusí e uso di papel i kontribuí na e esfuersonan di konservashon di medio ambiente. E ta enkurashá bishitantenan i interesadonan pa bishitá e website ofisial di STINAPA na www.stinapa.org pa informashon nobo i detayá riba e proseso di transishon i rekursonan adishonal.
Miéntras e transishon ta tumando lugá, Washington Slagbaai National Park ta spera di duna un eksperensia ainda mas práktiko i agradabel pa e bishitantenan, i ta rekonfirmá su dedikashon na preservá e bunitesa natural i e importansia kultural di e parke pa generashonnan benidero.
BròKèS 93.5 ………… Skuch’é!
.png)
Comments