VAPE A DRENTA SKOL

E sigaria elektróniko Vape a drenta nos skolnan. Indikashon fuerte ku aña eskolar tras di lomba a detektá alumnonan usando Vape. No solamente na skol sekundario esaki a pasa pero asta na algun skol básiko esaki a tuma lugá."Tin mucha ta bende nan i asta hür nan ku otro', nos fuente ta splika. E tipo di sigaria aki ta popular bou di hóbennan. Ku e Vape bo no ta sinti e sabor di tabako pues ta hasi humamentu mas dushi pa nos muchanan.

Hopi bia mayornan no ta na haltura ku e mucha ta usa Vape. Bo no mester di kandela i no tin holó ku ta keda pegá na bo paña òf kabei. Vape tamayo di un pèn i hopi bia e tin koló yamativo, loke ta aparentá di ta algu mas inosente. Mayornan sigur mester ta alerta pa ku esaki. Barbara Sol, direktor di Liseo Boneriano ta splika ku nan ta kontrolá strèn riba uso di Vape.

Ta disponé di informashon ku na skol básiko Kolegio Kristu Bon Wardador tambe a detektá uso di VAPE serka alumno. No por deskartá ku otro skolnan tambe ta konfrontá ku e problema aki.

Kiko presis ta Vape?

Básikamente Vape ta un sigaria elektróniko. Na lugá di tabako, tin un líkido, eta vaporá i e usadó ta inhal'é. E supstansia mas importante i mas konosí di e sigaria elektróniko ta nikotina kual ta hopi adiktivo, mas ku alkohòl i droga. Fabrikantenan di Vape ta añadi tur sorto di sabor kímiko pa hasié mas dushi. Na Hulanda e ta asina alarmante ku entrante 1 di yanüari 2024 ta prohibí pa fabrikantenan traha Vape ku sabor di mangel i fruta. Tambe den Oropa kompleto ta boga pa bin ku reglanan mas estrikto pa benta i kompra di Vape.

BròKèS 93.5 ………… Skuch’é!