Vários Notifikashon Pa Asistensia Polisial Durante Dia di Rincon

Kuerpo Polisial Hulanda Karibense(KPCN) ta wak bèk riba 30 di aprel, Dia di Rincon.

E dia a kuminsá ku un notifikashon alrededor di 5 or di mardugá di un outo di famia ku dos pasahero aden, ku a kore drenta mondi. E aksidente a tuma lugá den bisendario di Sabana Piedra Krus. No tabatin herido. Pa motibunan deskonosí, e shofùr di e outo a pèrdè kòntròl i drenta mondi. E por a mustra un reibeweis bálido pero e no por a mustra un prueba di seguro bálido. A konsekuensia di esaki el a haña un but.

Banda di esaki tabatin diferente notifikashon mas tokante aksidentenan sin herido.

Den oranan di mainta polis a skual un mucha hòmber ménor di edat pa motibu ku el a kue pikòp di su tata sin outorisashon i tabata fiver ku esaki riba Kaya Kòmkòmber.

Polis atende serio ku e yu i e tata riba esaki.

Durante e dia, Polis a risibí vários notifikashon di molèster di vehíkulo mal stashoná.

Esnan ku a mèldu tabata blòkiá pa otro vehíkulonan di manera ku nan no por a move for di e sitio i tabatin tambe entrada i salida di kasnan den Rincon ku vehíkulonan a blòkia.

Tambe a drenta vários notifikashon tokante personanan ku a bira malu durante di e dia.

A konsekuensia di esaki a dirigí ambulans. Polis a kita dos yabi di outo despues ku e shofùrnan bebí tabata ke drenta outo pa manehá. A informánan bon klá ku nan por pasa tuma nan yabi bèk ora ku nan ta bon na tinu o sea no bou di influensia di alkohòl

Den oranan di anochi tabatin diferente bringamentu entre presentenan i entre grupo. Durante e bringamentunan aki a tira ku bòter di glas tambe, ounke polis a pone enfásis riba kon importante ta pa husa beker òf kùp (re-usabel) na lugá di bòter di glas pa evitá situashonnan peligroso. Alrededor di 8.05 or di anochi a detené un hòmber di inisial J.G.A. di 19 aña di edat riba Kaya E.B. Sint Jago pa violashon di e Lei di Identifikashon BES.

Alrededor di 10 or di anochi a detené un hòmber di inisial S.B.E.C. di 47 aña di edat riba Kaminda Onima pa maltrato ku un arma i maltrato severo.

E sospechoso tabata enbolbí den un bringamentu riba Bulevar Miguel Pourier na Rincon i a hinka su víktima ku un opheto. Despues di e insidente, e sospechoso a drenta outo i a bandoná e sitio den direkshon di Playa. Polis a bai su tras i a detené.

Na promé instante e sospechoso no a rekshoná riba e señal ku a dun’é pa para, pero kòrtiku despues a logra para e sospechoso.

Ambulans a hiba e víktima hòspital pa tratamentu médiko. Ta investigando e kaso.

BròKèS 93.5 ………… Skuch’é!