Manera mi a bisa for di tempran, komo siudadano, lo mi duna un konseho di voto na e votadó KON i KIKO e mester evaluá ora di bai vota dia 15 di mart i hasi su eskoho entre e 6 partidonan ku ta partisipá na e elekshon. Pues ku esaki mi ta laga e libertat di eskoho kompletamente den man di e votadó i duna realse na e derecho fundamental di e ser humano pa skohe liber i den sekreto(segun su konsenshi) su 9 representantenan pa e próksimo kuater añanan. Na mi opinion tin tres pregunta simpel ku kada ken di nos por kontestá pa nan mes sin ningun hende mester influenshá nan den esaki. I si bo kontestá nan honesto nan lo ta e bos di bo konsenshi ku lo guiabo dia 15 awor pa kua partido i kua kandidato lo bo depositá bo voto.
Abo komo boneriano ta sinti ku bo a bai dilanti i huntu ku bo famia ta bibando riba un isla ku semper bo a deseá, esta ku trankilidat, ku hendenan amabel ku un ta yuda otro, ku semper a kuida su naturalesa i a balorisá su kultura, ku norma i balornan ku a pone ku e boneriano ta ketu bai tur parti di mundu gabá? Bo ta sinti ku bo tambe ta disfrutá i benefisiá di e desaroyo ku Boneiru ta pasando aden?
Abo komo boneriano ta sinti ku e bario den kual bo ta biba a mehorá pa loke ta su infrastruktura, su iluminashon, un bon transporte, su seguridat, sufisiente kasnan pagabel, sufisiente rekreashon i sufisiente tereno pa traha kas i su servisionan ku e mester duna i ku a hasi ku bo ta biba agradabel den bo bario sosialmente ku tur bo hendenan di bario.
Abo komo boneriano ta sinti ku e relashon ku Ulanda a pone bo identidat, bo kultura, bo naturalesa, bo tradishonnan i kustumbernan asina tantu bou di preshon ku bo ta sinti ku si no hasi algu konkreto, nos lo pèrdè e Boneiru ku nos a konosé i ku nos ta deseá pa ta den futuro?
Den e kampaña ku a pasa, riba e tres puntonan aki bo a skucha kon e aktual koalishon a akusá otro di ku esun a stroba otro pa realisá e puntonan aki i ku pa mantené e gobièrnu stabil tur e puntonan a keda drumi. Nan tur dos ta splika ku awor si nan lo bai traha dirigí riba e puntonan kon tal nan haña mandato total, esta 5 asiento.
Den e mesun kampaña ku a pasa bo a skucha e 4 otro partidonan trese dilanti ku ta falta di e aktual gobernashon ku e puntonan mará den e tres preguntanan no a keda realisá i ku nan si ta bin ku plannan konkreto pa kita e sufrimentu di un gran parti di nos poblashon, di para e baimentu atras di nos bárionan i di duna bèk Boneiru loke ta hasi Boneiru úniko den mundo. Nan tur kuater opviamente kier realisá e puntonan aki riba nan so esta ku un mandato total (5 asiento).
E kontestanan ku bo mes a duna riba kada un di e tres preguntanan simpel aki ta un reflekshon riba e periodo ku a pasa, kompañá ku loke bo a tende, skucha, lesa i mira durante e kampaña di loke nan kier bai hasi. Nan dos huntu ta mas ku sufisiente pa awor bo skucha e bos di bo konsenshi i hasi bo eskoho. Bo eskoho no solamente ta basá riba atendé ku bo nesesidatnan personal, sino e ta tambe pa krea un Boneiru sano i di harmonia pa nos tur por biba na pas ku otro i sigui desaroyá pa krea un futuro sólido pa generashonan ku ta bin.
Bo eskoho mañan ta pa huntu krea un Boneiru hustu i duradero den balansa, skuchando awor e bos di sufrimentu den silensio, pidiendo pa aktua ku determinashon pa hasi e diferensha den e kuater añanan benidero.
Norwin “Nòchi” Willem ta hasi un yamada na bo
HASI BON USO DI BO DERECHO, BAI VOTA
===========================================
BròKèS 93.5 ………… Skuch’é!
.png)
Comments