Un Boneiru solidario ku un futuro briante

Na tur presente i muy en partikular Pueblo Boneriano ku ta nos tur ku ta biba ariba e pida baranka aki: un felis Dia di Boneiru!

Awe, 6 di sèptèmber, nos ta selebrá ku nos ta Boneriano, nos ta selebrá ku nos ta biba na Boneiru, nos ta selebrá ku nos ta parti di e komunidat Boneriano i ku konhuntamente nos ta kompartí e kultura Boneriano den tur su fasetanan.

Nos himno i nos bandera ta prinsipal símbolonan di e koperashon ku mester tin entre nos suidadanonan Boneriano, no opstante kua pais di orígen, kredu, rasa, religion o hasta orientashon seksual. Nos tur ta biba bou di e mesun dak di e kas Boneiru ku UN solo bandera i UN solo himno ku e meta di bida pa nos ta felis.

Nos por ta orguyoso di un Boneiru ku un pueblo humilde, tolerante i ku gana di koperá ku otro pa e UN mihó Boneiru ku nos tur ta stima. Un Boneiru ku tin gana di desaroyá i ke bira ku tempu ménos dependiente. Un Boneiru ku ta lora manga di kamisa i traha i no ta keda hisa man na laira i pidi. Un Boneiru ku ke ta orguyoso di su potensial, su logronan i KEN e ta. Awe te dia pa nos selebrá nos orguyo. Nos tin tur motibu pa hasi esaki pasobra ora ku rònt mundu ta boga pa solidaridat, ya Boneiru ta sobresalí den esaki kaba.

Siensia ta splika ku solidaridat ta e laso ku nos tin ku nos kompatriotanan i ku e komunidat ku nos ta pertenesé na dje. Solidarismo i bon suidadania ta enserá ku nos ta sinti nos mes enbolbí ku nos komunidat i ku nos ta tuma nos responsabilidat den esei. Huntu nos ta perkurá ku ta dushi i agradabel pa nos biba riba nos isla i den nos bario. Konhuntamente nos ta sòru pa un ambiente, kaminda diferente kultura ku plaser ta biba huntu, i na unda e parti kaminda siudadanonan ta topa otro ta hunga un ròl di gran importansia, i kaminda rèspèt pa otro ta para sentral. Krea lasonan ku otro, reinforsá otro i konfia otro ta balornan ku tin tur kos di haber ku e deseo pa topa otro hopi mas tantu, deskubrí kiko ta trese nos mas serka otro i kon nos por fortalesé e konfiansa ku nos mester tin den otro.

Si nos wak bon rònt di nos mes, nos tin ku saka e konklushon ku na Boneiru nos ta riba bon kaminda ku esakinan. Nos ta kana dilanti. Pa nos sigui desaroyá e sentido di solidaridat aki nos tin ku kontinuá ku nos intentonan pa yega na un manera diferente di pensa, un manera diferente di atendé ku otro, un manera diferente di traha huntu.

Nos por yama esaki partisipashon i ku partisipashon nos ke mèn koperashon entre siudadanonan, organisashonnan i instansianan gubernamental. Huntu nos mester ke duna forma i realse na ehekushon di e tareanan gubernamental i e deseonan di nos komunidat. Ku otro palabra: nos ta kombensí ku si nos tur koperá ku otro esaki lo resultá den un komunidat mas bunita i mas fuerte ainda.

Na momentu ku nos promové i fomentá mas koperashon entre persona-, organisashon- i instansianan nos ta gana mas komprenshon i konosementu, loke ta kondusí na mas solidaridat. E ta duna nos mas empuhe pa realisá mas aktividat pa un mihó kombibensia i pa un oumento di bienestar, sin pèrdè nos propio identidat for di bista.

Nos komunidat ta kambiando di konstelashon pa motibu di siudadanonan di otro pais ku a establesé nan mes riba nos isla durante e añanan ku a transkurí, kada un ku nan propio antesedente kultural. Riba nos isla tambe a surgi un komunidat multiforme meskos ku a pasa práktikamente tur otro kaminda na mundu.

E diversidat aki nos ta mira bèk entre otro den diferente tipo di supermerkado i restorant, den e manera di hasi komèrsio en general i riba merkado laboral. E diversidat aki a lanta sierto diskushonnan sosial i polítiko riba nos isla. Tópikonan ta integrashon, manera di biba i anda ku otro, trabou, enseñansa, kuido i mas. Den liñanan grandi e diskushonnan ta drai rondó di e pregunta: diversidat ta un menasa òf un enrikesimentu?

Ta na su luga pa nos sigui ku e diskushonnan aki, pero hasiendo e eskoho pa positivismo.

Laga nos pone nos mes na altura di otro su konosementu i kalidatnan pa asina yega na mihó solushonnan. Esensial ta pa nos hasi uso di nos inteligensia, nos sintimentu i nos boluntat. Si nos tin un bon bista riba kiko nos mes ke, di mes nos lo aktua korekto.

Si nos aktua ku un meta mas ayá nos dilanti, ku bista riba nos komunidat kompleto, nos tur lo bai dilanti.

Nos hóbennan i muchanan tambe ta forma parti di un komunidat solidario. Investigashon ta mustra ku hóbennan ta konfrontá ménos problema si nan lanta den un ambiente kaminda tin kestion di lasonan sosial: un ambiente kaminda nan ta sinti nan mes bonbiní, respetá i no-diskriminá. Un ambiente kaminda nan ta ripará ku ta eksistí espektativanan positivo tokante di nan i kaminda nan ta eksperensiá ku nan tin balor. Naturalmente mester tin reglanan kaminda muchanan i hóbennan ta lantando, pero e yabi pa un klima positivo ta sintá mas den huntu ku nan krea un kultura. Muchanan mester tin e sintimentu ku nan tambe ta responsabel pa e kultura ei, nan mester haña e mensahe ku nan ta parti di dje i ku mester di nan pa realisá nan mes futuro. P’esei nan mester por mira nan komunidat komo un lugá kaminda nan por ‘train’ nan kompetensianan sosial pa asina bira siudadanonan solidario i aktivo.

Bonerianonan ta konosí komo hendenan ku semper a traha duru i ku no a duda ora mester a bandoná nan isla pa bai traha otro kaminda. Bonerianonan a traha komo marinero, kunukero, piskadó, den haf, den komèrsio, den turismo, den enseñansa, den gobernashon i riba hopi otro tereno nan a marka nan stèmpel, pero semper kedando modesto i humilde. Nos Bonerianonan sa ku traha huntu i kompartí konosementu ta duna e forsa pa krese i yega na proyektonan nobo. Huntu ku e Bonerianonan nobo i den solidaridat nos tin ku sigui riba e kaminda aki. Abo komo habitante, empresario, organisashon sosial, TUR hende ta bonbiní pa partisipá den e proseso aki.

Huntu nos ta hasi e diferensia, huntu nos ta Boneiru i huntu nos lo sigui konstruí Boneiru.

Pueblo Boneriano, ban kontinuá nos biahe pa un futuro briante. Esaki te momentu pa nos hendenan traha pa habri portanan di oportunidat pa nos yunan i nan generashonnan di futuro. Esaki te momentu pa nos restorá prosperidat i promové e kousa di pas riba nos isla. Esaki te momentu pa nos claim bèk e soño Boneriano i reafirmá e bèrdat fundamental ku di tantu ku nos ta riba Bonaire, tòg ta UN nos ta i ku miéntras nos ta hala rosea, nos tin speransa.

Felis dia di Boneiru!

Diskurso Dia di Bonaire 2023, Daisy Coffie, Lider di Frakshon M21.

BròKèS 93.5 ………… Skuch’é!