Tourism Corporation Bonaire ta organisá su di tres Bonaire Tourism Summit anual

Tema: Preservashon di nos prenda skondí

Tourism Corporation Bonaire (TCB), den kolaborashon ku su stakeholdernan, ta organisá su di tres Kumbre anual di Turismo na Boneiru (Bonaire Tourism Summit) dia 27 i 28 di sèptèmber 2023 na Courtyard by Marriott Bonaire, na honor di Dia Mundial di Turismo.

E tema di e Kumbre di Turismo na Boneiru di e aña akí ta: Preservashon di nos prenda skondí. Komo destinashon úniko i distinto for di loke ta komun, nos tin ku mantené e mesun esensia ku ta hasi di Boneiru loke e ta awor. Boneiru ta enfoká riba atraé bishitantenan ku ta konsiente di medio ambiente i ku ta apresiá e rekursonan natural di nos isla, ku ta sostené ekonomianan lokal, ku ta protehá nos patrimonio kultural i ku generalmente ta biaha étikamente responsabel, pa sòru ku nos generashonnan di futuro tambe por eksperensiá e maravianan di Boneiru i disfrutá di nan.

Tur aña dia 27 di sèptèmber nos ta selebrá Dia Mundial di Turismo. E meta di Dia Mundial di Turismo ta pa hasi hendenan konsiente di importansia di turismo den komunidatnan nashonal i internashonal i pa pone énfasis riba e balor ekonómiko agregá pa e komunidat. Pa selebrá e dia akí, TCB den kolaborashon ku su stakeholdernan Entidat Públiko Boneiru, Bonaire Hotel and Tourism Association (BONHATA), Campbell-Hill Aviation Group, Dunn&Co, Diamond Public Relations i Ofisina di Haf di Boneiru, huntu ku sektor privá, ta organisá un konferensia ku ta dura dos dia pa deliberá tokante futuro di nos isla, inisiativanan di ‘branding’, desaroyonan riba tereno di aviashon, aktualisashonnan di merkadeo i strategianan di relashonnan públiko, i e último desaroyonan i tendensianan den e sektor. Ku oradornan eksperto, tantu ‘keynote’ komo invitá, e propósito di e Kumbre di Turismo na Boneiru ta pa na tur posibel manera hiba sektor turístiko di Boneiru ‘na e siguiente nivel’, pa sigui ofresé i promové e karakterístikanan úniko di nos isla.

Riba e di dos dia di e Kumbre di Turismo na Boneiru, esta dia 28 di sèptèmber, sektor privá tin oportunidat pa trese nan aporte i ideanan dilanti tokante inisiativanan di merkadeo pa nos isla pa e aña binidero.

TCB i su stakeholdernan ta invitá sektor turístiko pa partisipá na e Kumbre di Turismo na Boneiru.

BròKèS 93.5 ………… Skuch’é!