TikTokernan influyente ta deskubrí Boneiru

Tourism Corporation Bonaire a risibí mas ku 35 ‘influencer’

Den wikènt di 9 pa 12 di sèptèmber Tourism Corporation Bonaire (TCB), den kolaborashon ku Diamond Public Relations, a yama bon biní na un grupo di 35 TikToker prominente for di Merka i Canada. Ku un alkanse konhunto di mas ku 40 mion siguidó riba TikTok i Instagram, e influencernan akí pa medio di ‘content’ atraktivo a mustra Boneiru su atrakshonnan kultural i ekológiko.

TikTok, ku tur luna ta konta ku 1500 mion usuario aktivo, a mira un oumento konsiderabel di siguidó adulto, partikularmente den grupo di edat di 18 pa 34 aña, di manera ku el a bira un plataforma krusial pa anunsiantenan.

Durante e evento di TikTok Island Hop, influencernan, for di personalidatnan di televishon te amantenan di buseo, a sumergí nan mes den Boneiru su kultura lokal, su naturalesa i su festividatnan. A konkluí e biahe ku un fiesta ekstravagante rònt di pisina di Grand Windsock Bonaire ku músika latino karibense ‘live’. Por mira ‘content’ di e evento akí riba TikTok i Instagram @BonaireIsland di TCB.

Despues di Boneiru e influencernan a mustra e fasilidat di ‘island hopping’, ora nan a kontinuá nan biahe pa Kòrsou.

Un gradisimentu sinsero ta bai pa e numeroso partnernan ku a hasi e TikTok Island Hop un éksito, entre otro Bamboo Bonaire, Blue Classroom, Bonaij Adventure Tours, Bonaire Vacation Villas, Cadushy Distillery, Divi Divi Air, Epic Tours Bonaire, Grand Windsock Bonaire, Landsailing Adventures Bonaire, Senses i hopi mas.

BròKèS 93.5 ………… Skuch’é!