Tourism Corporation Bonaire (TCB) den kolaborashon ku STINAPA Boneiru, ta lansa un ‘It’s in our Nature Airport Information Booth’ na Aeropuerto Flamingo di Boneiru. E meta ta pa mehorá e eksperensia di biahe pa tantu bishitantenan ku ta yega komo pa bishitantenan ku ta bandoná nos isla.
E stènt di informashon nobo, situá stratégikamente na Aeropuerto Flamingo, lo sirbi komo un rekurso balioso pa nos bishitantenan ku ta buska informashon tokante Boneiru su atrakshonnan, aktividatnan i servisionan. E ta brinda nos bishitantenan informashon esensial pa hasi nan estadia na nos isla mas plasentero i mas inolvidabel.
‘Nos ta kontentu di por traha huntu ku STINAPA riba e proyekto akí’, segun Miles Mercera, direktor di TCB. ‘E stènt di informashon akí ta un prueba di nos dedikashon pa sòru pa Boneiru su bishitantenan tin akseso fásil na informashon balioso tokante e bunitesa natural, e patrimonio kultural i e posibilidatnan rekreativo di nos isla.’
STINAPA, e Fundashon di Parkenan Nashonal na Boneiru, ta konosí pa su dedikashon na konservashon i protekshon di Boneiru su rekursonan natural. Nan enbolbimentu ku e proyekto akí ta fortifiká e importansia di turismo sostenibel i konsientisashon tokante medio ambiente.
E stènt di informashon ta ofresé un variedat amplio di medio, entre otro foyeto, posibilidat pa kumpra e ‘nature fee’, mapa i revista di instrukshon útil pa yuda nos bishitantenan eksperensiá Boneiru. Personal eksperto lo ta disponibel pa kontestá pregunta i hasi rekomendashon, di manera ku nos bishitantenan por probechá maksimalmente di nan tempu na nos isla.
Bishitantenan di Boneiru por verwagt informashon tokante nos atrakshonnan i aktividatnan tòp, nos posibilidatnan di kome i sali, turismo sostenibel, konservashon di medio ambiente, nos eventonan kultural, nos historia i nos festivalnan.
E stènt di informashon ta fortifiká nos isla su dedikashon pa brinda nos bishitantenan un servisio ekselente i personal i na mes momentu promové turismo responsabel.
Tantu TCB komo STINAPA ta anhelá pa yama nos bishitantenan bon biní na e stènt di informashon nobo.
BròKèS 93.5 ………… Skuch’é!
.png)
Comments