Prestashon turístiko mensual di Boneiru – Resultadonan preliminar
E resultadonan preliminar pa luna di ougùstùs 2023 ta mustra un total di 11.191 bishitante stayover na Boneiru. Esaki ta bini despues di un kantidat di 11.582 bishitante stayover na luna di ougùstùs di aña 2022 i 11.900 bishitante na luna di ougùstùs di aña 2019.
Remarkabel ta e bahada den kapasidat aéreo kompará ku tantu aña 2022 komo aña 2019. Banda di esaki KLM a kambia di avionnan Boeing 777 pa avionnan Airbus i e disponibilidat di asiento entre e islanan ABC serka e kompanianan lokal di aviashon ta limitá.
E merkadonan di prosedensia mas prinsipal pa turismo na Boneiru ta keda konsistente, ku Hulanda i Merka komo e paisnan ku ta kana dilanti. Bishitantenan hulandes a representá 5760 (51,5%) di e kantidat total di bishitante, miéntras Merka den luna di ougùstùs a kontribuí ku 2354 (21%) bishitante stayover.
Kòrsou ta keda hunga un ròl krusial den paisahe turístiko di Boneiru, ku 1594 (14,3%) bishitante for di nos isla besiña. Otro merkadonan importante ku a kontribuí na Boneiru su éksito turístiko ta entre otro Canada, Alemania, Aruba, Bélgika, Suisa, Colombia i Reino Uní. Den luna di ougùstùs 2023 Alemania a bini dilanti komo un merkado fuerte, ku 207 bishitante stayover registrá. Ku esaki Alemania ta resultá riba e lista di merkadonan ku a presta mihó pa luna di ougùstùs.
Pa loke ta trata demografia di e bishitantenan, e kategoria di edat entre 45 pa 54 aña ta keda bini dilanti bou di nos bishitantenan, loke ta aksentuá Boneiru su forsa di atrakshon riba biaheronan di edat mediano ku ta en buska di un variedat amplio di eksperensia.
Ora ku nos analisá e merkado merikano mas aleu, e estadonan mas importante for di unda nos bishitantenan a bini, ta Florida, California, Texas, New York, Colorado, Pennsylvania, North Carolina, Virginia, Georgia i New Jersey.
E bishitantenan hulandes a bini prinsipalmente for di e provinsianan den nort i den sùit di Hulanda, kaminda Noord-Brabant a resaltá.
Banda di esaki turismo krusero na Boneiru a duna un aporte ku 14.732 bishitante krusero ku a yega den luna di yüli, fasilitá pa presensia di tres barku krusero durante e luna ei.
BròKèS 93.5 ………… Skuch’é!
.png)
Comments