Special Olympics Boneiru ta kontentu ku primisia di Special Olympics Kingdom Games

Special Olympics Boneiru ta kontentu ku na luna di novèmber Boneiru ta anfitrion pa e promé Special Olympics Kingdom Games. E weganan ta tuma lugá dia 4 i 5 di novèmber di e aña akí. Atletanan for di e anterior Antia Hulandes ta kompetí ku otro den futbòl, atletismo, bocce, beisbòl 5, bich vólibòl i landamentu. Bintiseis atleta boneriano ta partisipá na e weganan i mas òf ménos 100 atleta di e otro islanan.

“Den pasado via Special Olympics Boneiru, atletanan ku un limitashon a partisipá na kompetensianan den eksterior. E aña akí mes tabatin un grupo di atleta na Berlin pa Special Olympics World Games. E atletanan ku no por a bai den eksterior, ta haña e oportunidat awor pa kompetí ku atletanan for di e otro islanan.” Asina Rolanda Hellburg-Makaar, presidente di Special Olympics Boneiru a deklará.

Na Special Olympics Kingdom Games e meta ta pa atletanan ku un limitashon topa ku otro. E idea ta pa e enkuentronan akí kondusí na fraternisashon. Na promé lugá no ta bai pa e kompetensia, pero pa hasi deporte huntu ku otro. A bini ku Special Olympics Kingdom Games pa mustra ku atletanan ku un limitashon ta forma parti di nos komunidat.

E deportistanan for di e otro islanan ta yega Boneiru dia 2 di novèmber. Dia 4 di novèmber tin apertura festivo di e weganan na Plaza Wilhelmina. Einan tambe ta tene e kareda tradishonal ku e antorcha ku kandela. Na Plaza Wilhelmina tin entretenimentu pa públiko i e atletanan.

Durante e weganan ta tene un Friends and Family Forum. E partisipantenan na e foro ta papia ku otro tokante kon importante deporte ta pa nos komunidat. Nan ta papia tambe tokante e nesesidat pa atletanan ku un limitashon ta partisipá na i ta konta den komunidat. Durante e weganan, Bon Bida ta ofresé un programa di Healthy Athletes. Esaki ta enfoká riba oumento di bienestar i mehorashon di salú di e atletanan.

Special Olympics Bonaire, Special Olympics International, Indebon, Thinc ahead, Bon Bida, Hòfi Kultural, TCB i ministerio di Salubridat Públiko, Bienestar i Deporte ta hasi e weganan posibel.

BròKèS 93.5 ………… Skuch’é!