Sociedad San Antonio de Padua (Sociedad) ta kumpli 98 aña di eksistensia djamars dia 1 di novèmber 2022.
Tabata dia 1 di novèmber 1924 ku a instalá e promé direktiva di e sosiedat.
Metanan di Sociedad San Antonio de Padua (Sociedad) ta pa: Defendé interes di miembronan a base di nan filosofia di bida i pèrkurá pa un entiero digno den mas ámplio sentido di palabra pa e miembronan.
E organisashon tin su propio edifisio den Rincon i esaki ta habrí tur djadumingu mainta di 9’or pa 12’or pa miembronan por akudí pa por paga kontribushon. Na Kòrsou tin un representante kaminda miembronan riba e isla ei por paga kontribushon.
Resientemente a adaptá statuto di Sociedad San Antonio de Padua di manera ku esakinan ta kumpli ku e tempu moderno i ku leinan ku ta na vigor aktualmente.
Mientrastantu por bisa ku den fin di siman ku a pasa Sociedad a lansa su página di facebook di manera ku e direktiva por komuniká ku su miembronan.
Di parti direktiva di Sociedad San Antonio de Padua, felisitashon na tur miembro pa e echo ku e organisashon ta kumpli 98 aña di eksistensia.
Direktiva ta hasi un yamada na tur miembro pa sigui kumpli ku e deber di paga kontribushon. Personanan for di diesdos aña por bira miembro di Sociedad.
Pa mas informashon por tuma kontakto ku direktiva riba djadumingu mainta na Kas di Sociedad na Rincon.
Pa loke ta trata desaroyonan den e organisashon, direktiva ta pidi miembronan pa sigui e página di facebook di Sociedad San Antonio de Padua.
.png)
