top of page
ggzsjjg.png

Sindikalismo na Boneiru parti 34, 4 sèptèmber 2023

Nòchi Willem, konsehero di Union Sindikal Boneriano, USIBO

Semper mi a trese dilanti ku sirkumstansianan laboral ta mes òf hasta tin biaha mas importante ku kondishonnan material na trabou. Den sindikalismo sin mas nos ta sostené e pensamentu ku trabou mester paga. Esaki ta masha simpel pa komprondé. Un akuerdo laboral ta un akuerdo entre un dunadó di trabou i un trahadó den kual partidonan ta palabrá ku e trahadó ta presta trabou i ku e dunadó di trabou ta pagué pa esaki. Pero banda di e akuerdo básiko aki tambe partidonan sea individualmente òf kolektivamente atraves di un CAO ta kunbiní un kantidat di otro kondishonnan bou di kua e dos partidonan aki ta sera e konvenio di trabou. Nan ta e kondishonnan primario manera salario, oumento periódiko a base di prestashon, adaptashon di salario na kosto di bida, pero tambe kondishonnan sekundario, manera kompensashon di fakashon, gratifikashon pa fin di aña, gratifikashon di añanan di servisio, diferente seguronan, pago pa overtaim, penshun ora stòp di traha, fondo di spar, ets, ets.


Banda di esakinan sindikalismo ta boga tambe pa sirkumstansianan laboral ta na òrdu. Esaki ta kai bou di leinan di seguridat riba tur tereno, bon alohamentu pa e trahadó, kantin adekuá kaminda e por pasa su ora di sosiego durante dia, maneho tokante relashon humano riba tereno di trabou, rèspèt pa otro i no diskriminashon. Un di e puntonan ku pa basta tempu sindikalismo ta opservando ta e echo ku mester por tin fleksibilidat den orario di trabou. Por interpretá fleksibilidat na diferente manera i bou di diferente sirkumstansia. Un ehèmpel di esaki ta e forma kon a atendé orario di trabou den temporada di COVID, kaminda a krea e posibilidat ku trahadó por a operá for di su kas basá riba palabrashonnan konkreto kiko e mester a produsí. Pues aki e faktor di pandemia a forsa tur hende di pensa kreativo pa garantisá kontinuidat di trabou, pero alabes garantisá produktividat máksimo di parti di e trahadó.


Un di e faktornan den e sektor di kompania ku ta traha kaminda na Boneiru ta e temperatura eksageradamente haltu ku ta reina durante dia riba nos isla. Un temperatura di entre 30 pa 35 grado Celsio pero ku ta lagabo sinti komo si fuera ta den 40 grado Celsio bo ta operá. Nos tur por tuma nota di esaki awor ku entre otro ta drechando na diferente parti di nos isla nos kareteranan. Igualmente e kaso aki ta presentá den e sektor di konstrukshon. Awe nos kier felisitá BWM ku den konsulta ku AFWB ku ta e sindikato ku ta representá e trahadónan den konstrukshon i rehabilitashon di nos kareteranan a tuma e desishon ku entrante 4 di sèptèmber i durante henter e luna a kambia e orario di trabou, teniendo kuenta ku e temperatura haltu i insoportabel i ku sin duda ta afektá salú di e trahadó, pero tambe su produktividat. E orario awor ta di seis or di mainta te ku dos or di merdia, pues 8 ora. Durante e 8 oranan aki e trahadó lo tin un pouze di 15 i un di 45 minüt, pues en total un ora di pouze durante dia. Pues e trahadó ta traha efektivamente shet ora pa dia, miéntras e pago ta keda basá riba 8 ora di trabou. Pa loke ta trabounan grandi di asfaltamentu, esaki lo kuminsá pa kuat’or di atardi, miéntras ku e orarionan di sosiego lo keda konforme nos leinan vigente. Dependiendo di e wer, lo normalisá e roster atrobe entrante 1 di òktober 2023. Di mi parti mi kier a rekomendá gerensia di BWM pa konsiderá pa mantené e skema aki komo prueba pa mas ku un luna so i analisá speshalmente e bentahanan ku esaki ta trese kuné pa loke ta produktividat di e trahadó, pero tambe kon e ta fasilitá e trahadó pa por atendé ku su asuntunan personal ya ku e tin algun ora ku e por bai ofisinanan ku si ta traha te ku mitar di sinku ò sink’or di atardi. Mi a djies menshoná dos posibel bentaha, pero mi tin sigur ku lo por tin mas. Ku e ehèmpel aki BWM a demonstrá bon kondukta komo dunadó di trabou, kaminda ela tene kuenta ku salú i produktividat di su empleadonan. Mi ta spera ku otro sektornan kaminda e sirkumstansianan ta igual tambe por sigui e ehèmpel aki. Sigur e sektor di konstrukshon por ta e siguiente ku ta anunsiá e kambio aki. Kisas esaki ta komienso di un era nobo na Boneiru, kaminda nos ta fleksibilisá nos orario di trabou, kaminda no solamente nos lo por krea mas trabou, sino na promé lugá nos por alsa produktividat di trabou na un nivel mas haltu. En todo kaso e ta bale la pena pa e bira un tema di diskushon nashonal.

BròKèS 93.5 ………… Skuch’é!

1 view

Comments


BROKES 93.5 - Mas i Mas ta skuch'e

Kontakto

Buskando mas informashon?
Tuma kontakto ku nos awe mes.

STUDIO; +599 701 0935

Djòni Leoneta; +599 786 9091

Ethel Leoneta; +599 796 9133

Djaluna pa djabièrnè

8or di mainta pa 6or di atardi

  • Instagram
  • YouTube
  • Facebook

Danki pa komunuika ku nos!

Nos Klientenan Felis

"Add a testimonial that a happy customer or client has said about working with you."

Amanda Johns, COO, HORIZON

Diamonds Music Logo.jpg
mcb.png
Untitled_edited.jpg
Logo - My Eye Optical.jpg
Bashi.png
bottom of page