Nòchi Willem, konsehero di Union Sindikal Boneriano, USIBO
Na mi konsepto, nos na Boneiru ta i lo bai eksperenshá e tempu kaminda sindikalismo ta bai tin un papel sumamente importante. Pues sindikalismo na Boneiru ta rekerí liderato sindikal serio, dediká i ku ta para fuerte pa e kousa di e trahadó i su famia. No tin espasio pa liderato ku ta hasi bunita, biaha aki biaha aya, pero ku no ta duna e miembronan ku ta paga kontribushon e servisio i sosten ku nan meresé.
For di 2012 lidernan sindikal a mira e nesesidat aki i den un forma madurá a bin huntu i a krea un plataforma di traha huntu pa e kousa di e trahadó. A realisá ku no por a sigui praktiká sindikalismo den e mesun forma i mester a krea un strategia i táktika mas adekuá i ku ta kuadra ku e eksigensia di e tempu ku Boneiru lo bai pasa aden despues di e eskoho pa ta den un laso direkto ku Ulanda i ku no ta kai bou di Antia Ulandes mas.
A disidí di lanta un plataforma sindikal bou di e nòmber USIBO, esta UNION SINDIKAL BONERIANO pa netamente atendé for di e punto di bista di e trahadó i su famia e desaroyo nobo sosial ekonómiko ku Boneiru lo bai pasa aden. Sindikalismo na e momento ei a mira ku nos mester traha brùg entre e partnernan ku ta responsabel pa e desaroyo aki i basha abou e murayanan ku pa años a eksistí entre dunadó di trabou, gobièrnu i sindikato. Un muraya ku su blòkinan tabata deskonfiansa, falta di rèspèt pa otro, falta di rekonosementu i falta di realisá ku koperashon, sosten di un pa otro lo ta e semènt ku lo garantisá un desaroyo sosial ekonómiko fuerte duradero i ku ta krea prosperidat i bienestar pa UN i TUR.
I por bisa ku e último 10 añanan e plataforma aki a funshoná positivamente i ku resultadonan konkreto i visibel. Pero e retonan grandi t’ei ainda pa nos atendé i tin retonan grandi pa e klase trahadó ku ta pidi atenshon rápido. Ta trata di modernisá nos leinan laboral den mas amplio sentido di palabra. Ainda e klase trahadó no ta gosa di e protekshonnan laboral moderno, ainda tin hopi deskriminashon riba flur di trabou, ainda e pago pa labor prestá ta laga di deseá. Ainda tin manipulashon i ainda falta e konsiensia na trabou ku ta NOS ta e kompania i ku posishon no mester ta nunka motibu pa nos komo kolega na trabou no tin bon relashon ku otro.
E reto mas grandi ta ku si sindikalismo na Boneiru kier keda eksitoso i no deteriorá, lidernan sindikal mester surpasá nan sombra di prepotensia, di egoismo i tuma e inisiativa pa drenta den koperashon ku otro. No mester drumi ku otro, pero si mester por sinta na mesa ku otro i atendé ku otro temanan ku ta di interes di nos tur, Realisá ku kana kada ken riba su so ta kuminda pa divishon, malkontentu i finalmente kiebro den sindikalismo. Den añanan 2012 nos a tuma e inisiativa i logra. Ta na esnan mas hóben awor pa sigui fortalesé brùgnan konstruí i mehorá esaki. E meta lo keda semper meskos, esta INTERES DI E KLASE TRAHADO I SU FAMIA i manera den kuminsamentu di tempu awe i den tur siglo di siglo FORSA LABORAL TA UNION. Pues ta e momento apropiá pa e lidernan di tur e sindikatonan na Boneiru bin huntu den un seshon pa fortifiká e plataforma. E pregunta ta KEN TA TUMA E KURASHI PA TUMA E INISIATIVA.
BròKèS 93.5 ………… Skuch’é!
.png)
Comentários