Despues di apertura djadumingu ultimo, e siman di muzik pa mucha ta den ful swing kaminda ku e tour den barionan di Boneiru ta kanando den bon ambiente. Djaluna a kuminsa ku tremendo tayér di steelpan bou di pal’i tamarein na Tera Kora kaminda ku e muchanan a haña un splikashon di kiko ta steelpan, kon pa tokanan i tambe nan a haña e oportunidat pa toka un kansion huntu ku e banda Silver Bullet. Naturalmente ACE Kids Club tambe tabata presente pa a duna un show di baile riba dos kantikanan di siman di müzik pa mucha, ku ta “Müzik ta Konektá” i “Müzik un lenga international”.
Riba e dia aki tambe a lansa e videoclip pa e “Muzik ta Konektá” kantá dor di e hobensita Maysi Trenidad. Den videoclip aki ku por wòrdu mirá riba e pagina di Youtube di ACE Foundation. Den e video e ta wordu kompañá pa miembronan di ACE Kids Club.
Djamars e tour a sigi pa School of Performing Arts Bonaire kaminda ku e muchanan a risibi un tayér di bailenan Afrobeat i Afro-Caribbean.. Esaki a termina ku un tremendo show riba esenario dilanti di Kompleho Deportivo Jogre Nicolaas. Riba djarason e tour a bai Nikiboko kaminda ku nan a siña tokante Reggae i a haña e oportunidat pa purba diferente instrumento i kanta kansionan manera “Three Little Birds” di Bob Marley huntu ku e banda Roots Vibrations.
Riba djaweps e tour den bario a sigi pa Antriol kaminda ku na parke Francisco “Chiku” Goeleo nan a siña tokante e ritmonan latino americano manera Salsa i tambe “boomwhackers”. Pa djabierne 26 di mei e tour lo sigi pa playa kaminda ku patras di misa di playa Casa de Musica lo duna un tayer di Bras. Art Culture Education Foundation ta invita tur mucha ku ke siña toka un instrument pa bini 5or di atardi na e parkeerplaats di misa. Despues di esaki ACE Kids Club lo sali den bus ku direkshon pa Skol Amplio Papa Cornes kaminda ku nan lo duna un show durante e show di talento ku ta tuma luga eynan. Tur mucha ku bini e workshop ku ke bai huntu ku ACE Kids Club por bai ku nan den bus pa mira e show.
Siguiendo pa mas den fin di siman riba djasabra, 11or di mainta lo tin un tayer di Ka’i Orgel trese durante e aktividat di Nos Zjilea na Mangazina di Rei kaminda ku ACE Kids Club tambe lo bai duna un show. Pa finalisa e siman lo bai tene e klousura den plenchi di SKAL Djadumingu atardi 5or ku varios presentashon di entre otro Brasband, Dance & More, ACE Kids Club i Tyziano ku ta bini for di Korsou pa duna un show pa nos muchanan. Tur mucha i nan mayornan ta invitá na tur aktividat di Siman di Muzik pa Mucha. Por check e programa riba nos pagina di Facebook, ACE Bonaire. Tambe por yama of whatsapp nos na number di telefon +5997900155 pa kuakle pregunta.
BròKèS 93.5 ………… Skuch’é!
.png)
