Segun Milena Winklaar Di MPB: Pueblo Ta Teme Ku Boneiru Ta Bai Bira Mas Karu Ainda

Resientemente nan a publiká resultado di un sondeo for di kua por a konkluí ku e preisnan den supermerkadonan na Boneiru a subi bastante atrobe den último lunanan.

Segun Milena Winklaar di partido MPB esaki ta un konfirmashon di loke hopi habitante ya ta mira i sinti pa basta luna kaba: ‘Nos ta mira ku esaki ta konsekuensia di e sueldo mínimo ku a subi na yanüari último. Es mas, e sueldo mínimo entrante 1 di yüli ta bolbe subi i bira $1750 pa luna.

Nos ta kere ku subida di sueldo mínimo mes ta algu bon i ku ta nesesario tambe,

pero nos mester purba prevení ku al final forsa di kompra no ta bai dilanti, pa motibu ku preisnan den supermerkado i otro negoshinan ta subi simultaneamente huntu kuné.

Nos no ta kere ku ta e kompanianan so mester karga e oumento di sueldo mínimo akí i e konsekuensianan ku esaki por trese kuné. Gobièrnu tambe mester asumí su responsabilidat i bin ku solushonnan kreativo kombiná ku supsidio, pa asina tene preisnan pagabel pa pueblo i tambe na mes momento yuda komersiantenan pa karga subida di sueldo mínimo. Mester tuma akshon pa evitá ku ora ku salarionan subi na luna di yüli awor, e preisnan den supermerkado i otro negoshinan ta subi atrobe.’