Segun Lider di Frakshon di Partido Demokrat, Rolanda Hellburg- Makaai; No A Korta Den Supsidio Di TCB

Último tempu por a tende masha rumor ku supuestamente a kòrta den supsidio di TCB i ku ta e motibu pa retiro di e direktor di TCB. Esaki no ta kuadra nada ku bèrdat. Na 2021 TCB a risibí algu mas ku 1.9 mion na supsidio.

Pa e añanan 2022 te ku awor TCB ta risibí 2 mion dòler na supsidio tur aña. Esaki kada ken por averiguá den kuentanan anual di 2021 te ku 2023. Pa bisa ku a kòrta den supsidio di TCB ta un mentira ku propósito pa mal informá nos pueblo.

Nos a tuma nota di insinuashon komo sifuera Kolegio Ehekutivo òf Diputado Abraham a kòrta den supsidio di TCB. Ni si Kolegio Ehekutivo òf Diputado Abraham tabata kier a hasi esaki, e no ta posibel, pasó ta Konseho Insular ta stipulá presupuesto, no Kolegio Ehekutivo ni Diputado Abraham.

Nos ta haña un duele ora nos skucha entre otro eks Diputado Thielman ekspresá ku a kòrta den supsidio di TCB. Komo eks diputado di Finansa sr. Thielman mester sa mihó ku esei i no malinformá nos pueblo. Esaki ta otro ehèmpel ku ta kere ku nos hendenan ta ignorante i ku lo no buska e bèrdat pa sa.

P’esei e pregunta ta lanta mesora ta ku ki intenshon ta malinformá nos Pueblo? Ta inkapasidat, mala fe òf un kaso di Chinini kome lubidá?

E BERDAT; Ta un echo ku tur e presupuestonan di Bonaire di e último añanan kaminda a stipulá e supsidio di TCB, Partido MPB a vota PRO pa esakinan i nan mes tambe a stipulá e supsidio na e montante di 2 mion.

E presupuesto di Teritorio di Boneiru pa 2024, no ta diferente.

Den presupuesto di 2024 ku a wòrdu stipulá pa Konseho Insular tin 2 mion dòler na supsidio pa TCB, kual a wòrdu stipulá unánimemente pa Konseho  Insular, kiermen inkluso MPB. Lider di MPB sr. Thielman no ta na altura kiko su propio Partido ta stipulá den Konseho Insular?

Ku e montante di 2 mion no ta sufisiente mas, nos sa!

Ku nos islanan ruman ta risibí muchu mas ku 2 mion pa hasi merkadeo, nos sa!

Ku mester kuminsá pensa den e direkshon pa hisa e montante di 2 mion, nos sa!

E gobièrnu nobo aki sostené pa e koalishon nobo ta konsiente ku e kompetensia eifó ta fuerte i kostoso. Nos ta dispuesto di evaluá i oumentá e montante aktual, si TCB presentá un plan í ku esaki ta na bienestar di e sektor turístiko di nos isla.