Un biaha mas SELIBON ta demonstrá nan mala fe i ta usa engaño pa tapa nan mal maneho. Ata pruebanan. Selibon a entamá un huisio sumario pidiendo pa hues sentensiá AFBW pa instruí trahadónan pa bai traha inmediatamente. Hues no a honra e petishon aki di Selibon i no a sentensiá AFBW, manera Selibon awor kier laga pasa. Selibon a pidi hues sentensiá AFBW pa paga 100 mil dòler pa kada ora ku AFBW no kumpli ku e sentensia. Aki tampoko hues a bai di akuerdo ku SELIBON i hues no a sentensiá AFBW manera Selibon a pidi.
Loke ta bèrdat ta ku hues a hasi un proposishon i ku SELIBON, su abogado, su direktor sintá ku AO den korte, e presidente- komisario ku ta biba na Kòrsou i den un forma arogante a sapatiá kontra hues su proposishon i insistí ku hues ta duna sentensia. Ta oranan a sinti ku hues a splika nan ku un sentensia lo no yuda solushoná nada, nan a sukumbí i a firma.
Mas aleu segun Abdul; Nan mala fe a sali mas fuerte dilanti ora ku hues a tuma nota ku apesar ku mediador a bin for di Aruba i of tresé mediashon, Selibon a nenga rotundamente i a insistí ku mester bai korte i insistí pa hues duna sentensia. Hues no por a komprondé dikon Selibon tabata persistí pa sentensia en bes di sinta na mesa.
Otro akto di mala fe ta e deklarashon ku Selibon ta bisa ku komo "bon" dunadó di trabou nan tin oido pa trahadó. Wèl si Selibon a praktiká e prinsipio di bon dunadó di trabou, e bin splika ta dikon 95% di e trahadónan por eskrito den un resolushon a deklará ku nan no tin apsolutamente ningun konfiansa den gerensia di Selibon. E intimidashon, maltrato, menasa i manera malu di papia ku e trahadónan ta muestra ku Selibon no ta digno pa karga e nòmber di bon dunadó di trabou.
Mira kon den nan komunikadonan ta menospresiá e trahadó bisando e "granito" ku kada trahadó ta aportá diariamente. Esta kurashi di un direktor di papia di un granito kaminda for di mainta te den oranan lat di atardi/anochi i bou di e sirkunstansianan inhumano e trahadónan aki ta laborá. Selibon no mester lubidá e lema ku trahadónan a usa "NAN PAFO, NOS PADEN. Esei no a pèrdè nada na forsa.
Finalmente e difamashon di korant ku lo tabatin menasa di morto ta un akusashon sin ningun klase di base ku e solo meta pa daña nòmber di e trahadónan. Trahadónan di Selibon a komportá nan mes na un manera super sivilisá durante nan akshon i a demonstrá un solidaridat grandi.
Trahadónan di Selibon por konta ku AFBW i su konseheronan ku nos lo para duru pa loke boso a welga p’e kuater dia largu, esta konstruí un SELIBON nobo, kaminda boso lo por traha den un ambiente sano, sigur i kaminda ta balorisá i respetá boso komo hende.
Te asina leu e komunikado di Ewald Abdul, Ko- fúndadó i Konsehero di AFBW, dunado su opinion tokante henter e situashon i disputa entre Selibon, sindikato AFBW i trahadónan.
===========================================
BròKèS 93.5 ………… Skuch’é!
.png)
Comments