Den su komunikado relashoná ku e konflikto entre gobièrnu di Boneiru i Piskabon,
Din Domacasse di partido MPB ta kuestioná e forma kon gobièrnu interpetá e presupuesto di e koperativa, partikularmente e kuestion di gastunan di personal.
Gastu di Personal; Gobièrnu ta kompará apel ku pera. Gastunan di trahadó ku gobiernu ta reklamá Piskabon ta basá riba un presupuesto muchu mas haltu pues e gastunan di personal logikamente ta sali mas haltu.
‘Den tur organisashon, gastu di personal ta haltu. Por ehèmpel, den gobièrnu di Boneiru mes, di 80 mion ku gobièrnu tin na entrada, entre 20 pa 30 mion ta bai na gastu di trahadó. Kasi 10 mion di gobièrnu ta bai na gastu di edifisio, koriente etc. Ku hopi arogansia diputadonan ke pone eksigensia pa Piskabon, pero gobièrnu mes no ta mihó. P’esei mi siguiente pregunta na gobièrnu ta: Kuantu diputado ta paga na hür awor akí pa e 5 edifisionan ku ta plamá rònt Boneiru ku gobièrnu ta hür pa e direktorado di
Planifikashon i Desaroyo? E trahadónan di Piskabon no ta sinta pòrnada i gana sèn.
Nan ta organisá vários proyekto pa piskadó, nan ta duna asistensia ku atministrashon i nan ta yuda piskadónan diariamente, ora nan mester di eis, djùg, zeta etc.’, segun Din Domacasse.
Diálogo, transparensia i koperashon; ‘Ta bon pa kòrda tambe ku e gobièrnu anterior a subi impuesto (e asina yamá ‘opcenten’ riba ‘vastgoedbelasting’) ku e meta pa yuda entre otro nos piskadónan. E impuesto akí ta trese algun mion den kaha di gobièrnu, anto e gobièrnu akí ke hasi ko’i meskiña ku Piskabon.
Si gobièrnu tin reklamo riba Piskabon esei ta posibel, pero bo no por yega kòrta nan sèn di e kontrato di kuido na mitar sin avisá promé i despues bo ta bin pidi pa sinta na mesa pa papia riba e reklamonan. Nos ta insistí riba diálogo, transparensia i koperashon pa por logra un solushon ku ta bon pa nos komunidat i pa nos piskadónan ku ta dependé di piskamentu pa pone pan riba mesa pa nan mes i nan famianan’, asina Domacasse a konkluí.
.png)
Comments